Loureiro: "Hai moita ilusión, esixencia, e momentos que é complicado responde a esa expectativa"

"Pensando xa no Ceuta", Miguel Loureiro espera aproveitar o partido desta fin de semana no Murube para mellorar as sensacións das últimas xornadas e volver á senda do triunfo tras derrótaa fronte ao Granada. O lateral dereito agarda que, a través da propia competición, poidan volver atoparse "ben e con confianza".

"Un mal partido non ten que embazar todo o que estamos a facer. Creo que estamos nunha situación moi boa e que debemos mirar para diante con optimismo. A situación, de cara a este tramo final, a nivel de clasificación, é moi boa e temos unha oportunidade e un reto moi bonito para poder gozalo e vivilo con ilusión", valora sobre o encontro ante o Granada e o futuro inmediato do Dépor.

"Temos que mellorar, sobre todo, en casa a nivel de resultados, de aquí a final de tempada vai ser importante", expresou Loureiro en xa un debate habitual nas últimas dúas tempadas sobre o rendemento do Dépor en Riazor, que de momento segue sendo inferior a fóra de casa.

Loureiro entende o malestar da afección do Deportivo

Loureiro entende o malestar da afección branquiazul, que asubiou ao seu equipo no último encontro. "Hai moita ilusión ao redor do equipo. Todos somos conscientes do proxecto no que estamos", expresou. Ao que engade que todo o vestiario traballa para intentar chega ao obxectivo: "Todos estamos moi ilusionados con este proxecto, pero cando hai moita ilusión, iso tradúcese en moita esixencia e expectativas moi altas. Hai momentos que é complicado responder a esas expectativas".

O cercedense cre que a afección será clave. Dos 13 duelos que quedan, sete son en Riazor: "Temos a mellor afección da categoría, vai ser un factor determinante ata o final de tempada e simplemente darlles as grazas polo apoio, que nos animen e que saiban que o equipo vai dalo todo ata o final".