A Coruña celebra o Día Internacional das Persoas Xordas cun acto conmemorativo

A Federación de Asociacións de Persoas Xordas de Galicia (Faxpg) organizou unha concentración na praza de María Pita da Coruña para defender os dereitos do colectivo

3 Fotos

Carlos Pardellas

A Coruña26 SEPT 2026 19:53

whatsapp facebook twitter email

Este sábado, 26 de setembro, celebrouse na Coruña o Día Internacional das Persoas Xordas. A Federación de Asociacións de Persoas Xordas de Galicia (Faxpg) organizou unha serie de actos conmemorativos co obxectivo de defender os dereitos das persoas que conforman este colectivo e pór de manifesto a necesidade de seguir avanzando na súa plena integración.

A directora xeral de Persoas con Discapacidade, Begoña Abeijón, participou na concentración celebrada esta mañá na praza de María Pita. Abeijón destacou a colaboración existente entre a Xunta co tecido asociativo composto por asociacións que traballan neste ámbito, sendo a Faxpg a federación de referencia.

A directora destacou, así mesmo, que a través da orde de axudas do 0,7% do IRPF e dun convenio, o Goberno galego financia servizos de logopedia, de intérpretes de Lingua de Signos Española ou de formación, así como actuacións para a mellora e o mantemento de instalacións.

Abeijón fixo fincapé en que, con esta colaboración, o Executivo autonómico contribúe a favorecer o desenvolvemento e a autonomía das persoas xordas, a eliminar as barreiras de comunicación ás que se enfrontan e a fortalecer o traballo do tecido asociativo.