Usos do litoral
A Xunta alega contra o novo Regulamento de Costas: «Limita as competencias recentemente asumidas»
O Executivo galego emprende unha ofensiva contra a reforma promovida polo Goberno central, preocupado polas restricións que podería impor ás concesións no litoral
Marta Villaverde e Ángeles Vázquez, esta tarde, na reunión co sector mar-industria e alcaldes do litoral. / Xoán Álvarez
X. A. Taboada
Dúas semanas despois de que o Goberno central abrise o procedemento para revisar o Regulamento de Costas co obxecto de limitar a duración das concesións en primeira liña de mar, endurecer as condicións para instalar un negocio ou flexibilizar os criterios para aumentar a zona de máxima protección, a Xunta lanzouse a crear en Galicia unha fronte contra esta pretensión no que pretende meter ao sector mar-industria e aos alcaldes do litoral para que se unan á ofensiva da Administración autonómica.
Para o Executivo galego, este intento do Ministerio para a Transición Ecolóxica é de «especial gravidade» porque se fai despois de que a comunidade autónoma asumise —o pasado día 1 de xullo— a xestión dos usos e a actividade no litoral. «Estas competencias veríanse claramente limitadas», expuxo o presidente da Xunta, Alfonso Rueda, tras un Consello no que se aprobaron, precisamente, as alegacións que presentará Galicia contra esta reforma normativa.
O desexo do Executivo galego é frear a iniciativa do Goberno central, que promoveu, aínda que sen éxito, esta reforma nos anos 2018 e 2024. Neste último, o Tribunal Supremo anulouna xa cando estaba aprobada por saltarse un procedemento de información pública que agora si se está respectando.
Na explicación das alegacións, Rueda sostén que o Ministerio para a Transición Ecolóxica emprendeu a revisión «pola porta de atrás, sen previo aviso e sen convocar antes ás comunidades autónomas».
Engadiu que ademais teme que primeiro se reforme o regulamento, para o que non fai falta unha maioría no Congreso, e que despois se modifique a lei. «Quérese volver a unha regulación restritiva que a Xunta interpreta que non debería ser así. Preténdese recortar a duración das prórrogas das concesións, endurecer os requisitos para establecer un negocio no litoral e ampliar o dominio público marítimo-terrestre, limitando a propiedade privada, económica e industrial e desprezando todos os controis que estableceu a Xunta para garantir o compromiso normativo», soltou o presidente galego.
Esta tarde, as conselleiras de Medio Ambiente, Ángeles Vázquez, e de Mar, Marta Villaverde, convocaron en Santiago a representantes do sector mar-industria e aos alcaldes do litoral para informarlles das eventuais consecuencias da reforma do Regulamento de Costas e tratar de formar unha fronte común contra a iniciativa do Ministerio para a Transición Ecolóxica.
Subscríbeche para seguir lendo
