BiciCoruña logra unha nova marca en 2025 ao aumentar un 28% o seu número de usos

Os 1.728.835 usos rexistrados de BiciCoruña durante 2025 supoñen a cuarta marca anual consecutivo deste servizo municipal, que incrementou un 28,6% o número de utilizacións destas bicicletas con respecto ao ano anterior ao sumar 385.382 máis. A alcaldesa, Inés Rey, sinalou este luns ao informar sobre estes datos que a media diaria de usos situouse en 4.742 usos, o que representa 1.061 máis que en 2024.

Rey tamén destacou que cando chegou á Alcaldía no ano 2019 houbo 206.946 usos, polo que a do ano pasado multiplica por oito a de entón. Segundo a rexedora, ese aumento  revela que o Goberno local cumpre os seus obxectivos de fomentar “unha mobilidade máis sostible e máis amable”.

En canto ao número de usuarios das bicis municipais, en 2025 alcanzáronse os 26.554, dos que están de alta de forma permanente no sistema 16.331. O mes con máis usos da historia de Bici Coruña foi outubro de 2025, no que se chegou aos 203.285.

Tamén o ano pasado alcanzouse o maior número de estacións, posto de que das 23 de 2019 pasouse ás 78 actuais, aínda que hai unha máis na intermodal que se abrirá ao público cando se inaugure esa terminal. A máis usada da cidade é a da praza de Pontevedra.

As estacións dispoñen de 1.437 ancoraxes para as bicis, que son 650 na actualidade, das cales 410 son eléctricas.  Rey puxo de relevo tamén que o uso de BiciCoruña evitou a emisión á atmosfera de 914.479 quilos de dióxido de carbono durante o ano pasado.

“Pasamos de ter unha rede de BiciCoruña que estaba pensada para o lecer para ser unha rede de transporte público para desprazarse ao lugar de traballo”, indicou a alcaldesa, xa que os datos do sistema revelan que as horas de maior uso son as de entrada e saída aos centros de traballo e educativos.

En canto ao aumento das estacións, a concelleira de Mobilidade, Noemí Díaz, advertiu que “o primeiro é ver como funcionan estas 30 novas estacións que acabamos de instalar, facer unha análise dos fluxos e ver posibles futuras necesidades”. Aínda así, recoñeceu que “cando remate a urbanización de Visma haberá que colocar algunha estación alí”, pero que no resto da cidade “as necesidades están cubertas”.

Sobre as bicicletas, Díaz sinalou que “a intención é que sigan aumentando o número de eléctricas, pero non podemos eliminar as mecánicas porque hai xente que as busca precisamente para facer deporte”.

Minutos antes da comparecencia do Goberno local, o BNG deu a coñecer unha moción que presentará no pleno sobre a mellora de BiciCoruña que se basea nas suxestións recollidas por este partido entre a cidadanía e que utilizou un vídeo da concelleira Avia Veira que tivo máis de dúas mil visualizacións. “Non se se non falar dun novo milagre plenario, os que se producen cando o BNG leva un asunto ao pleno e o Goberno Local recorda de súpeto que ten que actuar”, ironizou Veira sobre a convocatoria de prensa realizada o mesmo día polo Executivo municipal

“Hai moita xente que valora positivamente BiciCoruña, pero ao mesmo tempo entende que debe mellorar”, citou a edil nacionalista como resumo das peticións cidadás, nas que se pon de relevo a falta de bicicletas en horas punta, as estacións saturadas, os barrios sen cobertura ou os problemas de mantemento.

A moción do BNG pedirá que se cumpra o acordo orzamentario deste ano co PSOE que inclúe que Emalcsa e Emvsa garantan a viabilidade económica de BiciCoruña, ademais de aumentar os seus recursos materiais e humanos, ampliar o horario de uso desde as 06.00 ás 02.00 horas, incrementar as bicis e repartir as eléctricas polos barrios, elevar o tempo de uso gratuíto e os cinco minutos entre distintos usos, instalar estacións nos campus e a estación do tren provisional, así como poder chegar aos municipios da comarca coas bicis.

Sobre a proposta dos campus universitarios, a alcaldesa respondeu na súa comparecencia que se previu alí unha base “que non se chegou a instalar porque non son terreos municipais” e porque “as alternativas de transporte deben coordinarse coa Universidade para que sexan realmente efectivas”. Na súa opinión, pór unha base no campus “non daría un servizo efectivo porque se temos miles de alumnos e centos de profesores, unha base con seis, quince ou vinte bicis non vai liquidar a comunicación”.