A eclipse solar dispara o gasto de turistas estranxeiros na Coruña un 44%

A Coruña levaba meses preparándose para un fenómeno que apenas durou 76 segundos. O 12 de agosto, a cidade foi un dos puntos elixidos por visitantes chegados de distintos países para contemplar a eclipse solar total. Moitos reservaran con meses de antelación para pasar na cidade as noites previas ao fenómeno. Agora, os datos económicos permiten medir parte dese movemento.

O gasto dos turistas estranxeiros aumentou un 43,6% na provincia durante a semana da eclipse. A cifra corresponde ao período comprendido entre o 10 e o 16 de agosto e procede das compras presenciais realizadas con cartóns de entidades estranxeiras, segundo os datos recolleitos por BBVA Research. O incremento produciuse xusto nos días nos que a eclipse concentrou a chegada de visitantes e supón unha aceleración de crecemento de 24,4 puntos respecto da semana anterior.

O dato coruñés destaca especialmente cando se compara co conxunto do país. En España, o gasto dos viaxeiros estranxeiros aumentou un 13,8% interanual durante esa mesma semana. É dicir, A Coruña rexistrou un crecemento case tres veces e media superior ao nacional. Pero o mapa da eclipse deixa unha segunda lectura. A Coruña creceu moito, pero outras provincias fixérono aínda máis. Soria encabezou o aumento, cun 220,1%, seguida da Rioxa (106,2%) e Asturias (88,7%).

A razón ten que ver, segundo fontes dos promotores do estudo, coa situación de partida. As provincias que rexistraron os maiores incrementos son, en moitos casos, territorios que non parten dunha presenza tan elevada de turismo estranxeiro como os destinos máis consolidados do país, e cando un acontecemento extraordinario consegue atraer a miles de visitantes internacionais a unha zona que normalmente recibe menos, a porcentaxe de crecemento dispárase.

A Coruña, en cambio, ea conta cada verán cunha importante presenza de turistas estranxeiros. Por iso, aínda que a eclipse provocou unha chegada extraordinaria de visitantes e elevou con forza o gasto, o aumento porcentual resulta menos espectacular que en lugares onde o turismo internacional ten un peso menor. Non significa que o efecto fose pequeno, senón que se suma a unha actividade turística que xa estaba alta antes do fenómeno.

"A nivel hostalería, moi bos resultados"

A eclipse tamén chegou ao comercio entre a proposta de peche por parte da asociación astronómica Ío e a vontade dos diferentes sectores por manter a persiana subida. Aínda que o Concello impulsou a observación desde os barrios con máis de 40 puntos distribuídos na armazón urbana, certos espazos foron elixidos preferentemente. Máis aló do monte de San Pedro ou a Domus, os areais da cidade e o paseo marítimo gozaron de afluencia e clientes. En concreto, os espazos comerciais de Riazor e Orzán sentiron directamente o efecto.

A presidenta da Asociación de comerciantes Soho Orzán, Mónica Borrás, realiza un balance desigual da xornada para os empresarios do seu ámbito. "A nivel hostalería, moi bos resultados e un día bo. A nivel comercio xeral e pequeno comercio, normal ou mal. Ademais, numerosos locais non abriron durante a xornada. A gran maioría de comerciantes de Orzán son autónomos ou empleadores que tamén traballan nos seus negocios, así que tomaron a decisión por si mesmos. É agosto, tamén están as vacacións", explica Borrás.

"Foi unha xornada moi forte para bares e restaurantes, pero como o turismo en xeral. É no sector onde máis sente. No pequeno comercio de cando en cando percíbese e absórbese un fenómeno deste tipo, non na nosa zona comercial, polo menos. O beneficio queda en hostalería e nas grandes cadeas comerciais. Aos peches puntuais hai que sumar, por exemplo, o horario reducido de varios establecementos e o feito de que contamos cun notable número de empresas de servizos, que en agosto non viven o seu punto máis álxido. Agosto, como tal, é un mes que afecta a sectores moi concretos", puntualiza a presidenta de Soho Orzán.

Noutro sentido, a chegada de cinco cruceiros o día da eclipse con miles de pasaxeiros tamén marcou a afluencia na Coruña. Este perfil turístico, segundo expón Borrás, "non transcende" a esas rúas da cidade nin aos seus negocios. "Nós non estamos afectados pola chegada de cruceristas porque non chegan a pasar de certas liñas de rúas, ou porque non senten atraídos cara á oferta. Debería haber un cambio de enfoque no modelo", considera a presidenta da asociación.

Para a presidenta de Asociación de comerciantes e hostaleiros Cidade Escolar-Labañou-Riazor, Cruz López Vilariño, a xornada da eclipse foi "un bo día para todos" e destaca a gran afluencia na zona, "en especial, ingleses". "A eclipse atraeu a moita xente de fóra, moito viaxeiro de cruceiros, que non afán chegar tan lonxe. Iso resultoume moi rechamante e alégrame, porque poden achegarse a outras zonas, coñecer outros ambientes", apunta.

"Ese día había moito movemento na rúa e debido ao noso ámbito, o partido do Deportivo polo trofeo Teresa Herrera tamén se fixo moi presente. Si que debo destacar que o maior vulto foi antes e despois de a hora central da eclipse. Nese intre no medio, vías aos clientes ir cara aos miradoiros, porque era o suceso que viñan ver. Agosto é un mes estraño porque o comerciante tamén se vai de vacacións, pero a falta de valorar a xornada, diría que foi un bo día para todos. A pesar dos cortes de tráfico e os problemas, non viría mal un día así ao ano", subliñou López Vilariño.

O dobre de turista estranxeiro

O sector hoteleiro percibe algo semellante. O presidente da Asociación de Hospedaxe da Coruña, Agustín Collazos, explica que durante os dous días en torno ao fenómeno detectaron "un incremento considerable de turista estranxeiro". Moitos dos visitantes que chegaron expresamente para contemplalo viaxaron en grupos grandes e quedaron dúas noites.

O perfil tamén foi moi concreto. "Era sobre todo cliente americano", sinala Collazos. A chegada destes visitantes cambiou durante uns días o peso do turismo internacional nos hoteis coruñeses. Segundo o experto, os estranxeiros representan habitualmente ao redor do 25% dos clientes en agosto, mentres que durante os días da eclipse "practicamente duplicouse" e pasou "por encima do 50%".

A ocupación tamén rozou o cheo, con cifras do 98% e 99% en toda a cidade. Con todo, este dato non foi excepcional para o sector, xa que A Coruña alcanza niveis similares durante outros momentos fortes do verán. A diferenza estivo sobre todo na anticipación das reservas. "Xa practicamente en outubro do ano pasado tiñamos o 75% das reservas de toda a cidade xa ocupadas", explica Collazos.

O aumento do gasto tampouco implica necesariamente que cada turista gastase moito máis. Os datos de BBVA contabilizan o conxunto das compras realizadas con cartóns estranxeiros. Desde o sector hoteleiro consideran que o visitante que acudiu pola eclipse tivo un comportamento similar ao doutros turistas de lecer. "É un cliente leisure, o que vén e gasta máis ou menos o mesmo", sinala.

Si puido producirse un aumento do prezo dalgunhas habitacións para quen esperou ata o último momento. "Probablemente, os últimos clientes que chegaron pagasen máis caras a habitación", apunta, aínda que recoñece que non dispón de datos para cuantificalo.

Na Coruña, o turista internacional xa forma parte da paisaxe do verán. A eclipse conseguiu aumentar a súa presenza durante uns días e levar o gasto estranxeiro a niveis moi superiores aos habituais, pero non tivo que crear desde cero un fluxo turístico que a cidade xa recibe cada agosto.

Subscríbeche para seguir lendo