A nova ordenanza da teleasistencia na Coruña: chamadas de seguimento e dispositivos para detectar riscos

A Xunta de Goberno Local da Coruña aprobou este venres a nova Ordenanza Reguladora do Servizo Municipal de Teleasistencia Domiciliaria que substituirá a normativa actual vixente, nacida no ano 1998.

Este novo texto, que agora terá que ser aprobado no Pleno Municipal, adapta a regulación municipal á evolución experimentada polos servizos sociais, así como ao desenvolvemento do sistema de atención á dependencia e aos cambios do sistema de teleasistencia. O Concello destaca que xa non é exculsivamente un dispositivo de alarma senón que se converteu nun instrumento de prevención, acompañamento e detección de situacións de risco.

O motivo do cambio é que esta ordenanza respondía o modelo tecnolóxico existente no momento da súa instauración, a finais da época dos 90, que funcionaba cun teléfono instalado no domicilio e un pulsador co que a presenta usuaria contactaba cunha central de atención ante unha situación de emerxencia.

Esta nova regulación incorpora agora unha teleasistencia máis adapatada aos tempos actuais, onde se incorporan dispositivos adicionais de monitorización e detección de situacións de risco. Destaca o Concello que así se permite avanzar cara a unha atención máis preventiva e personalizada.

Chamadas de seguimento e acompañamento

A nova norma incorpora expresamente entre os obxectivos do servizo o seguimento preventivo, a detección de posibles situacións de risco , o fortalecemento das redes de apoio e a prevención da soidade non desexada e do illamento social. Inclúense chamadas periódicas de seguimento, axendas e recordatorios, información sobre recursos sociais e outros mecanismos de acompañamento que permitan anticipar necesidades e favorecer a permanencia das persoas na súa contorna habitual.

Ademais, por primeira vez establécese un catálogo específico de dereitos de preséntalas usuarias: recibir o servizo en condicións de calidade e continuidade, obter información sobre o seu funcionamento, respecto á intimidade, posibilidade de formular queixas ou suxestións e recibir unha atención respectuosa e profesional. Hai tamén unha regulación específica das ausencias e suspensións temporais, contemplando situacións como hospitalizacións, vacacións, estancias familiares, ingresos residenciais temporais, cambios de domicilio ou incidencias na vivenda. Prevese ademais unha valoración específica dos casos de especial vulnerabilidade.

A nova ordenanza ten en conta a relación e coexistencia con outros servizos de asistencia prestados por outras administracións ás persoas en situación de dependencia . O texto busca evitar duplicidades e, ao mesmo tempo, permite que os servizos sociais municipais valoren as situacións nas que poida existir un carácter complementario ou unha falta de efectividade do recurso recoñecido.

O BNG ve "necesario" actualizar a ordenanza porque a de 1999 "exclúe ás persoas xordas". Con todo, non acepta "a exclusión dos usuarios se se lles recoñece o dereito de ser usuarios do servizo da Xunta porque este é de pago e porque unha cousa é que ter o dereito recoñecido e outra que cho estean dando realmente". Os nacionalistas instan o Goberno galego a "traballar para que esa prestación sexa gratuíta".