Dominicos se desquita tras vencer ao Reus B e Compañía gaña ao GEiEG

Xornada redonda para os representantes coruñeses na OK Prata masculina. Dominicos sacouse un peso de encima contra o filial do Reus. O cadro de Pablo Togores dobregou á escuadra catalá en Monte Alto (3-1) e reencóntrase coa vitoria tres xornadas despois. Gonzalo Varela puxo as cousas de cara aos da Cidade Vella cun dobrete nos compases iniciais do encontro e Adrián Candamio sentenciou na segunda metade cun gol de falta directa tras a décima infracción visitante. Max Oliveras asinou o gol da honra reusense a falta de 49 segundos.

Tamén foi unha fin de semana feliz para Compañía de María. O equipo que dirixe Álex Canosa impúxose ao GEiEG en casa (2-1) cun dobrete de Kiko García, aínda que terminou sufrindo co tanto visitante no tramo final do duelo. O cadro colexial acumula seis duelos sen perder e prolonga unha boa dinámica que o sitúa na zona tranquila da táboa, con 20 puntos.