Múltiples despedidas nun OAR que apunta a cambio de ciclo

O Attica 21 OAR renóvase. Ao termo da súa primeira tempada na División de Honra Prata despois de case 20 anos en Primeira Estatal, o club coruñés despídese de oito xogadores para iniciar un novo proxecto con caras novas e a ambición restaurada. Gabriel Navarro, Sergio Torío, Alberto Roldán, Pepe Moura, Beltrán Bedia, Luisma de Goya, Juanka Ortiz e Rodrigo Ortega non seguirán na disciplina oarista e continuarán as súas carreiras deportivas noutros emprazamentos.

Baixas sensibles

Algunhas das saídas apuntan directamente ao corazón da bancada de San FranciscoJavie r por ser considerados heroes do ascenso. Os centrais Beltrán Bedia e Alberto Roldán, o extremo Pepe Moura, o lateral Luisma de Goya e Juanka Ortiz, que defendeu a camiseta oarista durante máis dun lustro, márchanse da Coruña idolatrados pola afección oarista.

Algúns, como Roldán, deixan un oco difícil de cubrir no apartado ofensivo coruñés (102 dianas en 28 encontros esta tempada), mentres que outros, como De Goya ou Ortiz, foron perdendo protagonismo paulatinamente nos plans de Nando González con respecto ao curso anterior. O club indica que todos eles "deixan pegada" e "forman parte da historia do OAR", á vez que lles desexa "toda a sorte do mundo" nos seus novos retos profesionais.

Paso exprés, pero importante

Entre as múltiples despedidas, tamén hai xogadores que militaron apenas un curso no OAR, pero cuxa presenza foi determinante para asinar unha tempada histórica. Gabriel Navarro aterrou na Coruña este verán, para axudar ao equipo no seu regreso a Prata, e, sobre a pista, cumpriu con fartura. O lateral dereito, de 1,96 de altura e unha potencia que marcou a diferenza no costado dereito oarista, chegou tras ascender co EÓN Horneo Alacante a Liga Asobal e non defraudou, con 128 goles en 30 partidos, o segundo máximo goleador da entidade por detrás de Álex Chan (138).

Sergio Torío foi outra das grandes apostas da dirección deportiva coruñesa unha vez logrado o salto de categoría. O leonés chegou para reforzar o pivote e consolidouse nos plans de Nando González grazas, sobre todo, ao seu sangue frío nos momentos determinantes dos duelos. Rubricou 55 tantos.

A Rodrigo Ortega non lle deu tempo de consolidarse. Chegou a finais de tempada para cubrir a baixa por lesión de Rubén Sánchez, procedente do Balonmán Argallo de Primeira Nacional. Unha aposta arriscada, desde unha categoría inferior, que culminou con 10 goles en 9 duelos disputados.