O Dépor Abanca entra na Copa en busca de boas sensacións

No medio dunha crise de resultados, tras seis xornadas sen coñecer a vitoria, e camiño do dificilísimo partido ante o FC Barcelona, o Deportivo Abanca fai unha pausa na liga para enfocarse na Copa da Raíña. Este mércores (20.00 hora española) enfróntase ao Guiniguada Apolinario, equipo canario que milita en Segunda Federación, mesma categoría, aínda que distinto grupo, que o filial.

Sen lesións, pero con rotacións previstas, o cadro branquiazul quere aproveitar a Copa para reencontrarse coa vitoria e as boas sensacións. «Hai ganas de volver gañar e temos unha oportunidade mañá na que o intentaremos», expresa o adestrador madrileño. «Temos que intentar facer unha boa actuación e intentar gañar o partido. É o único no que pensamos. Estamos moi enchufadas e preparándoo moi ben», expresou Alonso na previa.

Do conxunto canario, Fran Alonso destacou que «vén nunha boa serie» (quintas no grupo III) e que é un equipo con «moitísimos recursos de xogo directo», en especial desde o comezo, con envíos longos e perigosos. «Nun campo de céspede artificial é un equipo que non vai ser nada fácil. Imos desde o principio para entrar enchufadas, a intentar impor o noso xogo e darlle moitísimo valor ao partido», advertiu.

Merle Barth é a única baixa confirmada, aínda que non viaxará todo o persoal. A central queda fóra por «un catarro» e Alonso ten «cero lesiones». O equipo pasará a noite en Gran Canaria e regresará o xoves. Adestrará á súa volta en Abegondo.