A IA coruñesa que protexe as aves nos parques eólicos

A expansión das enerxías renovables ha aberto un debate complexo: como acelerar a descarbonización sen incrementar o impacto sobre os ecosistemas. Nos parques eólicos, unha das principais preocupacións ambientais é a afección sobre as aves.

Para responder a ese desafío, a firma coruñesa Instra Enxeñeiros desenvolveu Makemake, unha solución tecnolóxica baseada en intelixencia artificial capaz de detectar en tempo real ap resencia de avifauna preto dos aeroxeradores e actuar para minimizar o risco de colisión.

O sistema, premiado nos Energy Days 2024 na categoría de Innovación e que a firma o presentará este venres no XV Foro de Interacción Matemática Industria (Industry Day) en Santiago, combina visión artificial, procesamiento automatizado de imaxes e algoritmos adestrados especificamente para identificar aves en contornas eólicas. A solución foi desenvolvida xunto ao Centro Tecnolóxico de Telecomunicacións de Galicia, Gradiant, e permite actuar antes de que se produza un impacto.

A tecnoloxía funciona mediante varias cámaras instaladas na torre dos aeroxeradores, aínda que tamén poden situarse en zonas anexas para dar cobertura a varias máquinas de forma simultánea.

Risco de colisión

Eses dispositivos ofrecen unha visión de 360 graos da contorna e envían as imaxes a un sistema de computación que analiza en tempo real cada movemento detectado.

Cando o sistema identifica un ave e calcula un posible risco de colisión, pode activar distintas respostas automatizadas: desde disuasores acústicos para modificar a traxectoria do animal ata a redución de velocidade ou a parada temporal da turbina.

“Utilizamos e adestramos algoritmos de intelixencia artificial deseñados especificamente para procesar datos visuais como imaxes ou vídeos, co obxectivo de identificar aves nos parques eólicos e reducir o risco de impacto sobre a avifauna”, explica o CEO da compañía, Pedro Pérez Gabriel.

Adestramento

A capacidade de clasificación do sistema depende do adestramento continuo de redes neuronais capaces de diferenciar especies por características visuais como a envergadura das ás ou a forma do pico. Ademais, a tecnoloxía pode adaptarse ás particularidades de cada emprazamento e a especies concretas de cada zona.

O proxecto reflicte tamén como a intelixencia artificial e as matemáticas pasaron a ocupar un papel central na industria enerxética. Pérez Gabriel considera “esenciais” aos profesionais especializados en métodos numéricos e estatísticos porque achegan “ferramentas fundamentais para modelar problemas complexos e resolvelos a nivel computacional”.

Con sede no polígono de Pocomaco e presenza en Vigo, Madrid, Zaragoza, Barcelona, Holanda, México, Colombia ou Shanghái, Instra Enxeñeiros desenvolve proxectos nos cinco continentes.