A Xunta activa a alerta pola chegada de po en suspensión a Galicia e recomenda limitar a actividade ao aire libre

A Xunta activou a alerta pola chegada a Galicia de po en suspensión procedente do norte de África. De acordo cos modelos predictivos da Consellería de Medio Ambiente, isto pode provocar que en determinadas zonas de Galicia, sobre todo nas provincias de Ourense e de Lugo, a calidade do aire empeore, polo aumento das concentracións de partículas o mesmo, podendo producir efectos adversos na saúde humana.

Por este motivo, e para reducir o seu posible impacto na saúde, a Dirección Xeral de Saúde Pública recomenda, sobre todo, no caso da poboación sensible, limitar as actividades ao aire libre, como o exercicio intenso, pechar as portas e fiestras para evitar a entrada de po nos domicilios e usar máscaras e/ou lentes en exteriores.

A poboación que pode verse máis afectada pola mala calidade do aire, debido á elevación das partículas en suspensión, son as persoas con enfermidades pulmonares ou cardiocirculatorias, principalmente asma ou EPOC, os anciáns, nenos e embarazadas.

O tamaño das partículas, determina o risco do po para a saúde. Destas partículas, as que poden causar efectos nocivos na poboación, son as PM10 de 10 micras ou menores, que producen síntomas como irritación nos ollos, nariz, boca e garganta. As menores de 2,5 micras (PM2,5), ademais, teñen a capacidade de introducirse nos pulmóns e no torrente sanguíneo, producindo sobre todo, unha diminución da capacidade respiratoria o que provoca problemas respiratorios e agravamento das patoloxías crónicas, como a asma ou a EPOC.