O PPdeG impulsará reformas legais para impedir que condenados por delitos sexuais contra menores volvan á docencia

O PPdeG impulsará unha batería de iniciativas legais, tanto a nivel autonómico como estatal, para impedir que persoas condenadas por delitos sexuais contra menores poidan volver exercer a docencia. Así o anunciaron este xoves a secretaria xeral do partido, Paula Prado, e o conselleiro de Educación, Ciencia, Universidades e FP, Román Rodríguez. Durante unha reunión extraordinaria da comisión de Educación do partido, o conselleiro cualificou de «absolutamente despreciable e repugnante» a situación xerada tras a sentenza firme contra o exdiputado Xabier Ron por abuso de menores.

En concreto, a sede compostelá da Audiencia Provincial da Coruña condenou a nove anos e medio de prisión ao que fose deputado autonómico do grupo Alternativa Galega de Esquerda (AGE), Xabier Ron, por agredir sexualmente de forma continuada a unha nena de 12 anos da que fora profesor.

«Desde o primeiro momento pareceunos unha situación absolutamente despreciable, absolutamente repugnante e expomos algo que é de sentido común, que unha persoa con estas características nunca máis poida estar nunha aula educativa, dentro do espazo público e, menos aínda, en contacto con menores», subliñou o conselleiro en declaracións aos medios.

Segundo explicou, o Goberno galego está a avaliar diversas vías xurídicas e administrativas para articular medidas que imposibiliten que persoas desta «calaña» teñan presenza nas aulas, xa sexa en centros públicos, concertados ou privados.

Pola súa banda, Prado denunciou que a análise xurídica actual demostra que «non hai ferramentas suficientes» para evitar que estas persoas retomen o contacto con menores unha vez cumprida a súa condena e cancelados os seus antecedentes.

Prado lanzou unha dura crítica política, sinalando que casos como os de Xabier Ron, Martiño Ramos ou Rosendo Fernández teñen en común a súa vinculación coa «esquerda radical, o independentismo e a esquerda en xeral».

Neste sentido, afeou ao BNG a súa «falta de pronunciamiento» e tamén aproveitou para cuestionar directamente á vicepresidenta Yolanda Díaz polos procesos de «selección de persoal» na súa contorna política, dado que Ron foi a súa «man dereita» en Alternativa Galega de Esquerda.

Para atallar esta situación, o PPdeG anunciou que instará o Goberno galego a realizar todas as modificacións lexislativas que entren dentro da súa competencia autonómica.

Así mesmo, presentaranse propostas a nivel estatal para modificar o marco legal nacional, xa que consideran «fundamental» impedir por lei que estas persoas volvan traballar en centros docentes, campamentos ou como monitores de tempo libre.

Con todo, o conselleiro insistiu en que se solicitarán informes detallados para que «todo o peso da lei» cargue sobre este tipo de perfís e que existan mecanismos de actuación inmediata no futuro.

Subscríbeche para seguir lendo