PSdeG afea o «castigo» de Xunta ao excluír do Bono Concilia ás familias cuxos fillos foron a campamentos públicos

A voceira de Política Social do Grupo Parlamentario Socialista, Silvia Longueira, denunciou o «castigo» da Xunta ás familias cuxos fillos asistiron a un campamento público, ao excluír esta modalidade dos recursos bonificados polo Bono Concilia. A novidade, que introduce a orde do Bono Concilia Familia que a Consellería de Política Social e Igualdade publicou o martes no Diario Oficial de Galicia (DOG) afecta os campamentos organizados polas administracións públicas, subvencionándose así os privados.

«Anuncian campamentos públicos por unha porta e penalizan por outra ás familias que os utilizan. As familias non escollen entre público e privado por ideoloxía. Escollen o que atopan, cando o atopan e polo que poden pagar. Moitas combinan os dous porque non hai onde máis acudir», denunciou Longueira, segundo traslada o PSdeG en nota de prensa. Os socialistas afearon que a exclusión chega despois de que o presidente galego, Alfonso Rueda, presumise das 11.932 prazas e 5,5 millóns de euros, unhas prazas que «non dan dereito ao bono». «As familias reservaron praza na primavera e pagaron en xuño e xullo sen saber que aquel campamento ía deixar fóra», expuxo o PSdeG. Para Longueira, «cámbianse as regras co partido empezado», de forma que as familias que fixeron un esforzo económico en xuño non teñen forma de desfacelo en setembro.

Neste sentido, os socialistas sitúan a segunda parte do problema en como se reparte o que queda. O bono tramítase en réxime de concorrencia non competitiva, sen ningún baremo. Desta forma, a orde establece que a subvención se concede mediante actos sucesivos ata esgotar o crédito, que este ano é de 2.663.867 euros. Así as cousas, indicou Longueira, a renda familiar «non se ten en conta en ningún momento». «Pode quedar sen axuda unha familia con dificultades reais por presentar a solicitude o día 20, e cobrala outra con máis marxe por presentala o día 9», advertiu a deputada.

Ante este escenario, a socialista rexistrou unha batería de iniciativas no Parlamento para que a Consellería explique cal é a planificación e cales son os obxectivos reais da súa política de bonos, e coñecer que alternativa queda ás familias que xa pagaron campamentos e quedan fóra da axuda. Tamén, reclamará que se cambie o sistema de acceso para que se teñan en conta as condicións económicas, sociais e de vulnerabilidade das familias e dos menores, incluíndo a quen acudiu a campamentos das administracións públicas, habilítese unha liña de axudas para as familias que queden fose desta convocatoria e teñan unha situación socioeconómica que o xustifique.

Fonte: Faro de Vigo