A Xunta aproba o primeiro plan de coidados paliativos pediátricos para garantir unha atención unificada

Galicia contará co seu primeiro plan de coidados paliativos pediátricos, cuxa principal finalidade será reforzar a atención e desenvolver un dispositivo asistencial pensado para nenos e adolescentes. Esta folla de ruta, aprobada este luns na reunión semanal do Executivo galego, dará prioridade á atención domiciliaria, sempre que esta sexa posible, e creará un recurso de atención intermedia para os nenos que, debido á súa enfermidade, non poidan permanecer en casa, pero tampouco necesiten estar ingresados permanentemente nunha unidade de coidados intensivos.

O conselleiro de Sanidade, Antonio Gómez Caamaño, encargado de explicar este plan, detallou que estará dotado con tres millóns de euros e estenderase ata 2030. Entre as actuacións que contempla a Xunta están a creación de novas unidades especializadas nos hospitais de referencia de Santiago de Compostela, A Coruña e Vigo, así como a posto en marcha de equipos multidisciplinares especializados en coidados paliativos en todas as áreas sanitarias.

Será precisamente no último ano deste programa cando a Xunta prevé pór en marcha unha das medidas máis novas: Coidamos contigo, un servizo de respiro familiar que garanta o descanso dos responsables do coidado destes menores, así como a súa atención supervisada por profesionais. «O plan está encamiñado a que toda a poboación infantil que teña enfermidades crónicas, complexas e necesidades de coidados paliativos reciba unha asistencia integral, coordinada e personalizada, englobando todas as etapas da enfermidade e tamén tendo en conta ás súas familias», apuntou.

Para poder acometer estes obxectivos, o Servizo Galego de Saúde (Sergas) incorporará cinco novos pediatras e outros cinco profesionais de enfermería. O programa estrutúrase en catro liñas básicas de actuación: a clasificación dos pacientes; a organización e coordinación dos recursos e dispositivos asistenciais; a organización da atención integral aos nenos con enfermidade avanzada e aos seus familiares; e o impulso da formación e capacitación dos profesionais que interveñen no proceso.

Fonte: O Correo Gallego