O Goberno destina máis de 9 millóns a restaurar catro monumentos galegos

O Goberno central destinará 9,1 millóns de euros á recuperación e conservación de catro monumentos históricos de Galicia, situados nas provincias da Coruña e Lugo. Más da metade das axudas, un total de 5 millóns, concentraranse en Santiago de Compostela, onde se acometerán obras no mosteiro de San Martín Pinario e na Catedral. As outras dúas actuacións beneficiarán ao patrimonio monumental dos municipios lucenses de Lourenzá e Mondoñedo.

Os proxectos forman parte da convocatoria de 2025 do Programa 2% Cultural, cuxo listaxe provisional de actuacións acaba de aprobar a comisión mixta integrada polos ministerios de Vivenda e Axenda Urbana, Transportes e Mobilidade Sostible e Cultura. No conxunto de España, o Executivo seleccionou 78 actuacións en 73 municipios, cun investimento de 80 millóns de euros, despois de recibir 422 solicitudes. Galicia concentrará así ao redor do 11,5% dos fondos asignados.

A maior subvención concedida na comunidade será para o mosteiro de San Martín Pinario, en Santiago, que recibirá 3,7 millóns de euros destinados á adecuación das súas cubertas. Esta axuda permitirá financiar boa parte dunha intervención cuxo orzamento global ascende a case 5 millóns de euros. Trátase do proxecto galego que recibirá máis recursos nesta convocatoria.

Tamén na capital galega, o Goberno aprobou unha achega de 1,3 millóns para restaurar a cuberta da Catedral de Santiago e a fachada do Obradoiro, un dos conxuntos monumentais máis emblemáticos da comunidade.

As outras dúas intervencións desenvolveranse na provincia de Lugo, que concentrará algo máis de catro millóns de euros en subvencións. A máis importante será a destinada ao mosteiro de San Salvador de Lourenzá, que recibirá 2,8 millóns de euros para habilitar un espazo cultural. Pola súa banda, o complexo catedralicio de Mondoñedo contará cunha axuda de 1,2 millóns para acometer traballos de restauración e revitalización.

Unha nova convocatoria

A aprobación destas actuacións coincide coa autorización, este martes, dunha nova convocatoria do Programa 2% Cultural dotada con 45 millóns de euros para toda España, que previsiblemente se publicará antes de que finalice 2026. Desta forma, o Executivo lanzará axudas para a recuperación do patrimonio histórico durante dous anos consecutivos.

O programa finánciase mediante a reserva do 2% das partidas de determinados contratos de obras públicas para actuacións de conservación e enriquecemento do patrimonio histórico ou de fomento da creatividade artística.

Desde a súa posto en marcha, este instrumento permitiu aprobar 1.346 solicitudes correspondentes a proxectos cun orzamento conxunto de execución de 1.362 millóns de euros. As subvencións estatais suman 854,9 millóns, o que representa o 62,8% do custo das actuacións. A estas cifras engadiranse os 78 proxectos seleccionados na convocatoria de 2025.

Subscríbeche para seguir lendo