Sada concede licencia para rehabilitar la antigua Confitería Mora como hotel

A Rúa Oriente de Sada recuperará un dos seus inmobles máis emblemáticos: a antiga Confeitería Moura. O Concello de Sada concedeu licenza para rehabilitar este centenario edificio premodernista como aloxamento turístico.

O proxecto, que xa foi autorizado pola Dirección Xeral de Patrimonio, prevé a restauración desta histórica edificación situada no centro de Sada como un hotel de cinco habitacións con restaurante.

A antiga Confeitería Moura atópase á altura do número 10 da Rúa Oriente e está incluída no centro histórico da Tenencia. O proxecto inclúe o baleirado interior e a reposición da estrutura de madeira desta edificación deseñada presumiblemente por Juan de Ciórraga a principios do século XX. A fachada será rehabilitada para mellorar o seu illamento pero sen modificar a súa composición, materiais e cores. A licenza inclúe tamén a instalación dun ascensor e a substitución da cuberta.

A edificación emprázase na Praciña do Conde, no centro de Sada. Trátase dun dos poucos inmobles históricos que se conservan neste enclave, que perdeu algunha das súas xoias arquitectónicas, como a Casa de María Golán ou Ultramarinos Pollán, como recordaban na pasado Feira Modernista os encargados de realizalas rutas guiadas.

Este céntrico edificio acolleu durante anos a coñecida Confeitería Moura, rexentada pola familia do mesmo nome. Tras o peche deste negocio polo traslado dos seus propietarios a Santiago, o edificio acolleu unha tenda de electricidade e un comercio de artigos de enxoval, segundo detalla o portal web Memorias de Sada, que dedica un artigo a esta histórica edificación.

Os promotores da obra para reconverter a antiga Confeitería Moura en hotel deberán comezar os traballos no prazo máximo de seis meses a contar desde a concesión da licenza. O prazo máximo para executar as obras será de tres anos e, unha vez comezadas, non se poderán interromper por un período superior a seis meses, segundo recolle o decreto de concesión do permiso.  

O proxecto hoteleiro dispón xa da preceptiva autorización da Axencia de Turismo.

Licenzas de obra en Sada

O Concello de Sada experimentou un repunte na construción nos últimos anos. A rehabilitación desta edificación premodernista é unha das vinte licencias de obra maior que concedeu o Concello no que vai de ano.

O departamento municipal de Urbanismo tramita varios permisos para plurifamiliares. Está pendente de autorización tamén a reforma do edificio de 40 pisos de República Arxentina.