A borrasca 'Ingrid' deixa neve en Curtis e algúns estragos polo vento na área da Coruña

A neve callou na montaña coruñesa coa chegada da borrasca Ingrid. Curtis espertouse hoxe con algunhas paisaxes pintadas de branco por unha nevada que non foi moi copiosa pero si suficiente para dar esa tinguidura invernal que imprimen os copos aos concellos situados a maior altitude no cinto máis próximo ao área metropolitana coruñesa, caso tamén de Aranga e Sobrado dos Monxes.

Este temporal , de nome Ingrid, o de maior impacto en Galicia no que vai de inverno, deixou unha forte treboada con refachos de vento tempestuoso e saraiba na cidade da Coruña, con numerosas incidencias polo vento e caídas da subministración eléctrica que afectaron á iluminación pública e a rede semafórica da urbe coruñesa nas últimas horas. Tamén nos concellos da área metropolitana notáronse os estragos polo tempo tan desapracible que provocando esta borrasca, con alerta vermella na costa da Coruña. En Culleredo , por exemplo, esta noite desprendeuse unha chapa da fachada dun edificio de Anxo Senra e tiveron que ir os bombeiros para quitar outra que podía caer. Ademais, tamén en Culleredo, sobre as 06:00h ardeu un transformador no Monte Xalo, nunha zona onde hai varias antenas, e tamén foi necesaria a intervención dos bombeiros. Para rematar esta mañá unha rama dunha árbore cortaba un carril na estrada de Ledoño a Orro e, en Fonteculler, voou unha carpa dunha cafetería.