A Asociación de Familias Monomarentais de Galicia impartirá unha charla en Arteixo o 29 de outubro

A Asociación de Familias Monomarentais de Galicia (Fagamos) levará a Arteixo a campaña Moito que facer: coidados compartidos, unha iniciativa orientada a promover a corresponsabilidade social e a reflexión sobre a repartición das cargas familiares. A xornada celebrarase este xoves, 29 de outubro, no centro cívico cultural Manuel Murguía, coincidindo co Día Internacional dos Coidados e o Apoio. Organizado coa colaboración do Concello de Arteixo, o programa forma parte do proxecto Currunchiños de Conciliación —recoñecido en 2026 co galardón Medrando Xuntas ao Maior Impacto Social— e conta co financiamento da Consellería de Política Social e Igualdade e do Ministerio de Igualdade mediante o Plan Corresponsables.

A cita, gratuíta e de acceso libre, ofrecerá de 17.00 a 19.00 horas un punto de asesoramento aberto ao público para informar sobre corresponsabilidade, recursos específicos para familias monoparentais e oportunidades de voluntariado na entidade.

A partir das 19.00 horas, a programación continuará cunha charla informativa e un coloquio centrados nos usos do tempo e as brechas de xénero. Durante o encontro tamén se dará a coñecer o Plan de Voluntariado da asociación, mostrando vías concretas para que a cidadanía participe activamente no respaldo comunitario ás familias que afrontan a crianza en solitario.