Tristeza e preocupación pola subida de prezos e as condicións a Marathon Inferior

Estimado director,

Diríxome a vostede como socio do Deportivo da Coruña desde hai máis de 30 anos, un período no que a bancada de Marathon Inferior foi case como a miña segunda casa. Vivo lonxe de Galicia e, como moitos outros afeccionados, seguir ao equipo supón un gran esforzo económico e persoal: cadrar quendas, comprar billetes con antelación ou pasar longas horas ao volante. Cada desprazamento é unha pequena odisea que afronto con ilusión, porque o Dépor forma parte da miña identidade.

Por iso escribo esta carta non con enfado, senón con pena e preocupación. A enorme subida de prezos na renovación dos carnés de socio está a supor un golpe duro para centos de familias e afeccionados con recursos limitados. Moitos ven obrigados a reformularse a súa permanencia, xusto na tempada do retorno a Primeira División tras case unha década de ausencia. Unha tempada que debería estar marcada pola ilusión está a verse embazada por unha fractura social incomprensible.

Especialmente triste é o trato que reciben os socios de Marathon Inferior. As novas medidas —identificacións na bancada, prohibición de ceder o abono a familiares ou amigos e a imposibilidade de liberalo— fannos sentir sinalados e sospeitosos. Estas condicións fan practicamente imposible cumprir o requisito de asistir a 15 dos 19 partidos da tempada para quen vivo por centos de quilómetros.

Entendemos a necesidade dun maior control e asistencia, pero estas medidas expulsan precisamente aos afeccionados máis leais e sacrificados, aqueles que sostiveron o club nos peores momentos. Os socios comprendemos o contexto económico de Primeira División, pero solicitamos condicións razoables que nos permitan continuar sen sentirnos excluídos: sentido común e respecto.

Espero que esta carta invite á directiva para reflexionar e buscar un equilibrio. O Deportivo necesita aos seus socios tanto como os socios necesitamos ao club. Estamos a tempo de corrixir o rumbo e volver remar xuntos.

Atentamente,

Ramón Rey

Socio nº 3185