Os problemas de saúde mental disparan as discapacidades en Galicia: xa son un 40 por cento máis en seis anos

A saúde mental está a converterse nun problema sanitario de primeira orde, que causa xa serias limitacións na vida das persoas que sofren estes trastornos. De feito, a maior prevalencia destas enfermidades provocou un incremento das solicitudes de discapacidade. Nun informe do Ministerio de Dereitos Sociais, a Xunta, a través da xefa do Servizo de Valoración da Discapacidade, Beatriz Seoane, recoñece o «marcado cambio» que supuxo a pandemia: «Antes o perfil era maioritariamente físico e despois pasou a ser maioritariamente mixto, porque as patoloxías psíquicas disparáronse».

E as cifras reflicten esta tendencia. Segundo o «Estudo exploratorio sobre a prevalencia, características e proceso de valoración da discapacidade en España», na comunidade galega catro de cada dez solicitudes presentadas o ano pasado para solicitar unha incapacidade alegaron problemas mentais. Das nove autonomías que participan no estudo, Galicia é a que ten un maior peso das solicitudes relacionadas con este tipo de limitacións. En todo caso, o Ministerio de Dereitos Sociais inclúe aquí tanto as patoloxías psicolóxicas como as discapacidades intelectuais.

A Xunta achácao ao aumento de patoloxías psíquicas que se rexistrou tras a pandemia. E así o evidencia ademais o Censo de Persoas con Discapacidade da Consellería de Política Social. Entre 2019 e 2025 a cifra total de galegos que teñen unha minusvalía recoñecida creceu un 16,4 por cento, pero foron las incapacidades vinculadas a unha enfermidade mental as que máis creceron: un 42 por cento (de 57.000 persoas pasouse a máis de 81.000 o ano pasado). Fronte a elas, as limitacións de tipo intelectual descenderon un 11 por cento, as de carácter físico subiron un 12 por cento e as sensoriais aumentaron un 26 por cento.

Enfermidades incapacitantes

E que tipo de problemas mentais poden ser tan graves como para levar ao recoñecemento dunha discapacidade? Pois, desde casos de esquizofrenia, trastorno bipolar, depresión maior grave e recorrente, trastornos de personalidade, trastornos obsesivos compulsivos graves ou casos de ansiedade moi incapacitantes. Pero, tal e como advirte, a xefa do Servizo de Valoración da Discapacidade da Xunta, na maioría das situacións estas patoloxías aparecen mesturadas con outras limitacións de tipo físico.

De feito, é moi habitual que as persoas que soliciten a discapacidade teñan máis dunha «deficiencia». Isto mídeo o Baremo de Avaliación da Deficiencia Global da Persoa, establecido polo Goberno para as valoracións de discapacidade, que usa o historial clínico e as probas médicas para determinar as alteracións por sistemas corporais: por exemplo, funcións mentais, sistema nervioso, dor, estruturas do ollo e o oído... Segundo esta guía, en Galicia o 85 por cento das solicitudes valoradas presentaba dúas ou máis disfuncións. E o 60 por cento, sufría máis de tres, a porcentaxe máis elevada de todas as comunidades analizadas.

Subscríbeche para seguir lendo