A Illa de San Simón acolle esta fin de semana unha nova edición de Sinsal SON Estrela Galicia, o evento máis singular do panorama cultural galego

O Festival Sinsal SON Estrela Galicia, a cita máis singular do verán cultural galego, que se celebra desde hai 15 anos na Illa de San Simón, inicia hoxe a súa travesía musical cunha programación que volve apostar pola creación contemporánea e a diversidade de sonoridades.

O certame comeza en terra firme durante a mañá con dous concertos inaugurais en localizacións moi especiais de Vigo e para os que xa non quedan entradas dispoñibles: o músico Mateo Mena ofrecerá unha actuación no Planetario do Instituto Marítimo Pesqueiro do Atlántico, mentres que Carme López, renovadora da música tradicional, levará a súa proposta sonora á cámara semianecoica da Universidade de Vigo.

Tras o inicio en Vigo, o festival porá rumbo cara á Illa de San Simón á primeira hora da tarde. Desde hoxe e ata o domingo, o público embarcará desde os peiraos da Estación Marítima de Vigo e de Meirande (Redondela) —os dous únicos puntos de acceso habilitados— para vivir unha experiencia musical a cegas, xa que o cartel do festival segue sendo secreto e non se desvela ata o desembarco.

A programación musical de San Simón estará formada por case unha vintena de bandas e solistas procedentes de Galicia, Alemaña, Colombia, Inglaterra, Malí, Portugal ou Xapón, entre outros territorios. Haberá numerosos estreas en territorio estatal —con artistas de Asia, África e América que actúan por primeira vez en España—, mentres que o público poderá escoitar por primeira vez en Galicia algúns dos proxectos máis premiados nos últimos meses pola industria musical independente.

Música sen présas

A estancia en San Simón —cunha capacidade limitada a 800 persoas por día— está deseñada para descubrir e vivir a música sen présas. Ademais dos concertos en horario diúrno e en pequeno formato repartidos polos catro escenarios da illa, o festival desprega unha programación paralela que inclúe paseos divulgativos para dar a coñecer o patrimonio natural e histórico de San Simón, ademais de talleres, presentacións e unha coidada oferta gastronómica de proximidade.

A cita mantén ademais o seu compromiso coa contorna a través da iniciativa #sinsalsenrastro, un modelo de xestión de residuos posto en marcha en 2024 e que aposta polo Punto R como centro de reciclaxe e información ambiental, o fomento do Kit Festivalero entre o público, a reutilización de vasos, a eliminación das papeleiras na illa e o uso de cinceiros portátiles coa intención de reducir a pegada humana nun espazo declarado BIC.

Os concertos inaugurais de Vigo e os da Illa de San Simón abren a edición 2026 do Sinsal, unha travesía que continuará a próxima semana (do 31 de xullo ao 2 de agosto), ao estender a súa programación musical polo Camiño Portugués ao seu paso por Vigo, Oia e Braga (Portugal).

Artistas como Laverca Bentley, Maria Rodés ou As Netas do Charli actuarán nalgúns dos espazos máis emblemáticos desta travesía, como o Porto de Vigo —nos peiraos de Bouzas e Areal, onde Rodés actuará entre bloques xigantes de granito chegados de todo o mundo— ou o Real Mosteiro de Oia.

Ademais, o Museo do Mar de Galicia, en Vigo, acollerá unha xornada musical durante a tarde e noite do sábado 1 moi próxima ao concepto do propio festival: o dun cartel secreto formado por bandas e solistas de catro países —con tres estreas a nivel estatal e un galego— que se celebra nun recinto que, á súa vez, mestura vangarda e tradición.