Resultados da Oficina Municipal de Vivenda na Coruña: tres de cada catro consultas diarias son pola zona tensionada

No número 32 do Paseo de Rolda, na Coruña, atópase a Oficina Municipal de Vivenda, "servizo público municipal orientado a ofrecer asesoramento directo á cidadanía en materia de vivenda, especialmente ás persoas arrendatarias", explica a alcaldesa na súa visita ás instalacións o luns, 20 de abril. Recibe unha media de catro consultas diarias —unhas 20 semanais—; tres de cada catro son relativas á zona tensionada, aínda que Inés Rey resalta a baixada do prezo de aluguer: "Dende xuño do ano pasado, que estaba de media en 771 euros, ata hoxe, que está de media en 700, baixou 71 euros de media. Son datos do Observatorio Galego de Vivenda".

Doutra banda, limítase o prezo dos novos contratos "á última renda vixente nos cinco anos anteriores", e os incrementos máximos poden ser do 10% sobre o prezo do contrato anterior, "con algunha excepción". A oficina funciona como un punto de atención e información "fundamentalmente en materia de alugueiro", operando en horario de mañá de forma presencial e telefónica, de 9.00 a 14.00 horas. "Resolvemos dúbidas sobre contratos, sobre actualización de rendas, sobre dereitos e obrigas de inquilinos e propietarios e tamén toda a información sobre a normativa vixente", informa Inés Rey, quen engade que nos próximos días incorporarán máis persoal ao local.

Estabilizar o mercado

A alcaldesa reitera que a orientación ofrecida na Empresa Municipal de Vivenda, Servizos e Actividades (Emvsa) é "evidentemente fiable", tratando de garantir "que a cidadanía teña asesoramento gratuíto en materia de vivenda". Na oficina tamén regulan os pisos turísticos e xestionan o parque de vivendas municipal: "Son todos eses inmobles destinados ao alugueiro, en total 410 vivendas [das cales 49 son para asistencia social de urxencia], e ademais tamén hai locais, prazas de garaxe, trasteiros, etcétera", indica Inés Rey, quen pon de manifesto a necesidade de construír máis vivenda pública, dado o aumento da demanda. "Ou que tratamos é de evitar subas desproporcionadas, que ou mercado sexa máis estable e dar estabilidade aos inquilinos. Transformar a vivenda non nun obxecto de consumo, senón nun fogar", comenta.

Aclara, tamén, que os efectos da declaración de zona de mercado residencial tensionado sobre a oferta de pisos de aluguer "hai que analizalos dun xeito moi determinado". "A maior estabilidade e a maior duración dos contratos, é evidente que existe menos oferta", di. Pero, ao mesmo tempo, "persoas que estaban a piques de rescindir eses contratos ou imposibilitadas a continuar nunha vivenda por unha subida desorbitada do prezo, viron como os seus contratos mantéñense, prorróganse". Recoñece que hai menos anuncios nos portais inmobiliarios, "pero non porque os propietarios teñen medo de alugar, senón porque os contratos que había son moito máis estables".