A Coruña e o taxi avanzan nun proxecto para concentrar a mobilidade metropolitana

Parar un taxi e que calquera vehículo dispoñible poida recoller ao pasaxeiro, aínda que pertenza a outro municipio da área metropolitana, é a idea sobre a que xa traballan o Concello da Coruña e o sector do taxi. Tras o acordo entre a Xunta e o Concello coruñés para levalo a cabo, taxistas e Goberno local deron este luns o primeiro paso para facelo posible cunha reunión na que coincidiron na necesidade de crear unha Área de Prestación Conxunta que mellore o servizo e facilite a mobilidade entre os concellos da contorna.

O Concello da Coruña e as dúas asociacións que representan ao sector do taxi na cidade, Radiotaxi e TeleTaxi, iniciaron os traballos para impulsar a creación do proxecto que permita mellorar a mobilidade entre A Coruña e os municipios da área metropolitana. A primeira reunión, celebrada este luns, concluíu cun clima de entendemento entre as partes, aínda que tanto o Goberno local como os representantes do sector coinciden en que o proxecto se atopa aínda nunha fase moi inicial.

O voceiro do Goberno municipal e concelleiro de Economía e Planificación Estratéxica, José Manuel Lage, e a concelleira de Seguridade Cidadá e Interior, Montse Paz, mantiveron un encontro co presidente de Radiotaxi, Antonio Vázquez Ramos, e o presidente de TeleTaxi, Ricardo Villamisar. Segundo trasladou o Concello, existe unha "total sintonía" para avanzar nunha regulación consensuada que permita mellorar o servizo público do taxi e, ao mesmo tempo, as condicións de traballo dos profesionais.

O obxectivo é elaborar unha ordenanza supramunicipal, acordada co sector e cos concellos da área metropolitana, que regule o funcionamento desta área de prestación conxunta. Lage defendeu que a mobilidade "desborda os límites municipais" e apostou por alcanzar un acordo con municipios como Oleiros, Arteixo, Cambre e Culleredo para sacar adiante a iniciativa. Ademais, recordou que os concellos implicados disporán dun prazo de tres meses para pronunciarse sobre a proposta.

Desde Radiotaxi valoran este primeiro encontro. O seu presidente, Antonio Vázquez, asegura que se deron "os primeiros pasos" para construír unha ordenanza na que todos poidan realizar achegas. "O máis importante é pensar no usuario", explica. Como exemplo, sinala que un taxi que acabe de deixar a un viaxeiro nun municipio veciño debería poder recoller legalmente a outra persoa que solicite un servizo sen que existan as limitacións actuais. "Ao final o cidadán non distingue se o taxi é da Coruña, Cambre ou Oleiros; o que quere é que lle presten o servizo", afirma.

Vázquez insiste en que aínda serán necesarias novas reunións para trasladar todas as propostas ao borrador da futura normativa, que posteriormente deberá ser aprobada polos distintos concellos e validada pola Xunta de Galicia. "Todo ten que quedar ben regulado para saber que se pode facer e que non", engade.

Nunha liña similar exprésase o presidente de TeleTaxi, Ricardo Villamisar, quen considera que a reunión supuxo "un primeiro punto de encontro" entre o Goberno municipal e o colectivo. "Todo o que sexa mellorar o servizo do taxi estamos a favor, pero hai que ver como termina", sinala. Villamisar explica que agora esperan recibir un primeiro borrador para poder presentar as súas achegas e recalca que a futura regulación deberá garantir que "ningún municipio nin ningún colectivo de taxistas salga prexudicado". "Ten que haber colaboración entre todos, pero cada concello debe seguir cubrindo as súas propias paradas. Trátase de mellorar a mobilidade sen que ninguén perda", sostén.

As dúas asociacións coinciden en que o proxecto pode ser positivo se se desenvolve mediante o diálogo entre administracións e o sector. Polo momento, todas as partes considérano "unha primeira toma de contacto" que servirá para seguir perfilando unha proposta común antes de redactar a futura ordenanza.