O Congreso apoia mellorar o tren entre A Coruña e Ferrol e iniciar o proxecto do baipás de Betanzos

Respaldo da Cámara Baixa a mellorar o tren entre A Coruña e Ferrol. A Comisión de Transportes do Congreso aprobou este martes, con 31 votos favorables e catro abstencións, unha proposición non de lei do BNG para mellorar a liña ferroviaria entre as dúas cidades. En concreto, insta o Goberno a resolver este ano a tramitación do estudo informativo do baipás de Betanzos que debe reducir os tempos de viaxe e iniciar a redacción do proxecto de construción; a redacción adxudicouse en 2019 e debería completarse en dous anos, per ou non se presentou ata 2024, e non hai data para a obra. Tamén a empezar un estudo informativo para mellorar a liña entre A Coruña e Ferrol, con melloras como rectificación de curvas, renovación de túneles, duplicación de vía, electrificación e puntos de cruzamento para mercancías.

Entre outras melloras orientadas á área de Ferrol e a dotar a esta cidade de alta velocidade, a iniciativa inclúe aumentar frecuencias e horarios na súa conexión coa Coruña. O deputado do BNG na Cámara baixa, Néstor Rego, sinalou que a modernización pasa por "unha obra fundamental", a do baipás de Betanzos. Actualmente redactouse o estudo informativo, sinalou, pero segue pendente a resolución das alegacións. O proxecto construtivo, insistiu, debe facerse canto antes.

Os socialistas apoiaron a iniciativa, e a deputada do PSdeG Monserrat García reclamou unha "transformación profunda" da ligazón da Coruña e Ferrol, non "pequenos remendos". Defendeu as accións do Executivo central, que, afirmou, situou a liña "na axenda ferroviaria estatal e puxo en marcha actuacións concretas para mellorala" e planifica investimentos "de electrificación, renovación de vía e modernización". Entre as iniciativas citou o baipás de Betanzos, aínda non realizado, investimentos na rede de tren portuaria ferrolá.