Inés Rey carga contra os Franco polo seu patrimonio: "Non traballaron na súa vida e todo o que teñen é o que roubaron durante a ditadura"

A alcaldesa da Coruña, InésRey , lanzou unha dura crítica contra a familia Franco e a orixe do seu patrimonio. "Os Franco non traballaron na súa vida e todo o que teñen é o que roubaron durante a época da ditadura franquista, onde o caudillo entendía que todo era seu. As casas, os pazos, as xoias", afirmou a pregutas dos medios durante a presentación de DATAfórum 2026.

Rey cuestionou tamén de onde procede a riqueza que conserva actualmente a familia. "Eu non sei en que momento é todo froito dese arduo traballo ao que se dedican. Ademais de cobrar as rendas de todos os garaxes que quedaron no barrio de Salamanca, de que traballos veñen? O que non teñen é vergoña", sostivo. A continuación elevou o ton das súas críticas: "Despois de espoliar este país, tiña que caerlle a cara de vergoña aos Franco. Estamos a aguantar xa esta terceira xeración".

Críticas ao que levaron da Casa Cornide

Entre os bens aos que fixo referencia aparece a Casa Cornide, da que recordou que "levaron ata os embellecedores dos enchufes". Rey continuou a súa crítica dicindo que "me resulta tremendamente desagradable, paréceme unha desvergoña o que fan. Son uns lerchos. Quedáronllo todo". Tamén aludiu a outro inmoble vinculado á familia, como o pazo de Meirás, do que dixo que "o espoliaron".

Rey pechou a súa intervención contrapondo a situación patrimonial dos Franco coas vítimas que aínda permanecen en fosas. "Que nun país europeo teñamos aínda mortos nas cunetas sen poder enterrar mentres esta xente séguese forrando poxando bens que son de todos paréceme unha burla á democracia e aos españois, sobre todo aos que seguen enterrados nas cunetas e cuxas familias ao sitio ao que ir chorar", asegurou antes de concluír. "E quédome curta".