El BNG presenta enmiendas para que los presupuestos de la Xunta destinen 217 millones más a A Coruña y su comarca

O BNG rexistrou no Parlamento un conxunto de emendas parciais ao proxecto de orzamentos da Xunta para 2027 co obxectivo de que o Goberno galego destine 217 millóns de euros máis á cidade da Coruña e a súa comarca: 116 millóns para a cidade e 111 para a súa contorna.

"O proxecto de orzamentos é pura propaganda. Repite partidas de exercicios anteriores que non se executaron e non atende ás necesidades dunha cidade e unha comarca que son o motor económico do país. O Goberno de Rueda segue actuando coma se A Coruña non existise", afirman as deputadas Mercedes Queixas e Iria Taibo.

Defenden que A Coruña non existe para un PP "sectario" que desde a Xunta castiga a aqueles concellos que non goberna. "Por iso, A Coruña queda, ano tras ano, no vagón de cola. Isto vémolo en cada orzamento, coa sucesión de partidas que non se executan ou que se aprazan tanto que acaban desaparecendo", denunciaron.

En canto á cidade da Coruña, o BNG rexistrou ao redor de 20 emendas parciais, por un valor total de preto de 116 millóns de euros, co obxectivo de "compensar o desequilibrio e o atraso ao que o PP condena á Coruña desde hai 17 anos".

As nacionalistas propoñen recuperar os 100,1 millóns comprometidos para o Chuac, reforzar os centros de saúde e crear un parque de vivenda pública. Tamén expoñen construír unha escola infantil e unha residencia para maiores, mellorar colexios e a planificación educativa en novos barrios, habilitar un refuxio climático ou corredor verde, recuperar o proxecto dun albergue de peregrinos e financiar actuacións culturais, como a conservación dos murais de Lugrís e a posto en valor do legado de Luís Seoane.