Escotet, na Deputación da Coruña despois do ascenso: "A fidelidade da afección foi determinante para devolver ao Deportivo ao lugar que lle corresponde

O Deportivo non deixa de celebrar a súa volta a Primeira División. A entidade branquiazul visitou este martes a sede da Deputación da Coruña para festexar o seu regreso á máxima categoría coa institución provincial. No acto, o presidente branquiazul, Juan Carlos Escotet, sinalou que o ascenso sitúa de novo á provincia en "un escenario de máxima visibilidade" e que supón "a recompensa a moitos anos de esforzo, constancia e compromiso colectivo". Neste sentido, o dirixente venezolano agradeceu o apoio de "moitos anos" da Deputación a "unha institución que forma parte da historia social e deportiva da provincia", como é o club branquiazul.

Escotet non quixo esquecerse da afección coruñesa, que levou ao equipo polo aire nos seus peores momentos da última década. "O club atravesou etapas moi esixentes e, precisamente neses momentos, foi cando máis se evidenciou a fortaleza do deportivismo. Esa fidelidade foi determinante para manter viva a ambición de recuperar o lugar que corresponde a esta institución", asegurou o presidente.

De cara á próxima tempada, Juan Carlos Escotet recoñece que "comeza unha nova etapa ilusionante", pero tamén "moi esixente" na máxima categoría do fútbol español. "A Primeira División obriga a seguir crecendo con responsabilidade, planificación e estabilidade. Ese seguirá sendo o noso compromiso, consolidar un proxecto sólido, competitivo e preparado para o futuro".

A Deputación celebra o regreso de "un símbolo"

"O Deportivo é un símbolo daquilo que nos une e congréganos como galegos e galegas", declarou o presidente da Deputación da Coruña, Valentín González Formoso, no seu encontro coa expedición branquiazul. "Nun estadio tan simbólico como Riazor, transcenden as fronteiras das cidades e as provincias, así como ideoloxías políticas ou calquera sentimento que no día a día podería distanciarnos", resaltou.

González Formoso tamén puxo en valor á afección branquiazul, á que tachou de "incrible e envexada por todos os clubs de España" e ao consello de administración do club: "O presidente [Juan Carlos Escotet] deu un paso complexo ao asumir a presidencia que mereceu moito a pena. Queremos agradecerlle, en nome de toda a provincia, o esforzo realizado para lograr unha aspiración de todo un país, como é Galicia".