Jonathan Asp Jensen, o último na reducida saga de xogadores nórdicos no Deportivo

O Deportivo anunciou este luns a fichaxe do futbolista danés Jonathan Asp Jensen. O mediapunta de 20 anos procede do Bayern de Múnic, co que chegou a debutar hai dous anos en Bundesliga ás ordes de Thomas Tuchel. O futbolista atraeu as miradas doutros clubs europeos. No entanto, vestirá a próxima tempada a camiseta branquiazul.

O club mantén a súa aposta de peitear o mercado en busca de xogadores novos, con proxección e capacidade de revalorización mentres confirma a súa amplitude de miras. Nas últimas fiestras de fichaxes deixou clara a súa intención de buscar fóra de España xogadores cos que reforzar as súas filas. Comezou con movementos como o de Zakaria Eddahchouri, Nemanja Tosic e Denis Genreau en xaneiro de 2025 e non deixou de mirar ao estranxeiro desde entón. Asp Jensen, no entanto, súmase a unha lista moi selecta de xogadores de países nórdicos que defenderon as cores do Deportivo.

Os xogadores nórdicos do Deportivo

O mercado nórdico, con xogadores nados en Dinamarca, Noruega, Suecia, Finlandia ou Islandia, non foi o caladoiro habitual do Deportivo. Non o foi nos últimos mercados, nos que volveu abrirse ao estranxeiro, nin desde que a Lei Bosman comezou a internacionalizar as transferencias de xogadores. No que vai deste século son apenas catro os xogadores con pasaporte nórdico que vestiron a camiseta herculina.

O primeiro deles foi Christian Wilhelmsson. O atacante sueco chegou en xaneiro de 2008 ao Deportivo coa misión de reforzar a un equipo que corría o serio risco de baixar a Segunda División. Recalou na Coruña cedido polo Bolton tras unha traxectoria na que chegou a pasar polo Nantes e a Roma.

Como branquiazul, converteuse no talismán da salvación do equipo que, entón, dirixía Miguel Ángel Lotina. Sumou un gol e dúas asistencias en quince partidos, pero o seu achegue no xogo serviu para insuflar vida a un equipo que pasou de pelexar polo descenso para clasificarse para a Copa da UEFA vía Intertoto. Ao acabar a tempada, e co obxectivo cumprido, regresou a Inglaterra. Continuou a súa carreira en Francia, Arabia Saudita, Catar, Estados Unidos, Emiratos Árabes e retirouse en Suecia.

Un par de anos máis tarde, en 2010, chegou ás filas do Deportivo outro futbolista nórdico, pero do país veciño. Knut Olav Rindaroy reforzou o lateral esquerdo de Lotina naquel verán. Chegou cedido polo Molde noruegués tras chegar a debutar coa selección absoluta do seu país.

Con todo, non puido deixar pegada no seu paso pola Coruña. Apenas participou en catro partidos 400 minutos repartidos por seis encontros de liga e Copa. Non puido arrebatarlle a titularidade en liga a Morel nin a Manuel Pablo. En 2011, tras o descenso a Segunda, regresou a un Molde no completou o resto da súa traxectoria.

O último danés do Deportivo

Asp Jensen segue os pasos como danés no Deportivo que marcou hai uns anos Michael Krohn-Dehli. O centrocampista chegou á Coruña no inverno de 2018 para reforzar aos pupilos de Cristóbal Parralo, que logo serían os de Clarence Seedorf. A pesar do seu pasado no Celta, chegou procedente do Sevilla para tratar de salvar os mobles dunha tempada calamitosa. Non puido evitar o descenso a Segunda, pero quedou no club na categoría de prata. Foi un dos pesos pesados do centro do campo de Natxo González e José Luis Martí naquel curso 2018-19 que terminou co ascenso frustrado en Mallorca. Colgou as botas tras aquel grolo amargo en Son Moix.

O último xogador con nacionalidade nórdica naceu realmente en Barcelona. Max Svensson completou a dianteira do Dépor na tempada 2022-23 en Primeira RFEF. Aínda que é de Cataluña, ten dobre nacionalidade sueca. O seu pai, Tomas, porteiro internacional de balonmán. Xogou no Barça e foi dúas veces campión do mundo. Actualmente, ten contrato co Casa Pía na primeira división de Portugal.

Jonathan Asp Jensen toma agora a testemuña dos xogadores nórdicos no Deportivo. Ao seu favor ten o cartel de ser unha das grandes xoias da canteira do Bayern de Múnic. A súa versatilidade resultará capital para encaixar nos esquemas de Antonio Hidalgo e para crecer a pasos axigantados en Riazor .