O Superior eleva a un ano e 9 meses a pena de cárcere á presidenta dunha comunidade de veciños de Culleredo que desviou máis de 9.000 euros

A Sala do Civil e Penal do Tribunal Superior de Xustiza de Galicia (TSXG) confirmou a condena por un delito continuado de apropiación indebida á expresidenta e administradora dunha comunidade de propietarios situada en Culleredo. O Superior corrixiu á alza a pena inicial ditada pola Audiencia Provincial da Coruña, elevando a condena dun ano de prisión a un ano, 9 meses e un día de cárcere tras estimar un recurso presentado polo Ministerio Fiscal.

Os feitos remóntanse ao ano 2015, cando a acusada foi designada presidenta do inmoble no que residía, no municipio de Culleredo. Aproveitando que tamén era titular dunha xestoría encargada da administración de leiras urbanas, a xunta de veciños delegoulle a xestión da comunidade e autorizouna para manexar a conta bancaria da comunidade. Segundo ratifica a sentenza, movida por un ánimo de enriquecemento ilícito, a muller teceu unha rede de desvíos de diñeiro que supuxo un prexuízo total de 9.216 euros para as contas dos residentes.

Trampas nas actas e desvíos a empresas propias

O Tribunal Superior de Xustiza de Galicia (TSXG) detalla que a condenada chegou a alterar de xeito unilateral o acta dunha xunta de propietarios para modificar as súas funcións. A partir de aí, comezou a realizar cargos mensuais á conta veciñal a favor dunha sociedade da que era administradora por servizos que nunca se chegaron a prestar no edificio. Tamén realizou reintegros en efectivo no seu propio beneficio aproveitando que era a única que controlaba as claves bancarias.

A fraude máis cuantiosa executouse tras unhas obras de reparación na cuberta do edificio. A acusada emitiu tres transferencias bancarias facendo constar que ían dirixidas á empresa construtora que arranxara o tellado do inmoble. Con todo, eses fondos nunca chegaron á construtora, senón que acabaron ingresados directamente nas contas persoais da administradora. Ademais, desviou preto de 1.000 euros a outra empresa da súa propiedade dedicada ao sector do frío industrial, unha actividade completamente allea ás necesidades do edificio.