Turismo de Galicia impulsa o Camiño de Santiago no Reino Unido con miras ao Xacobeo 2027

O director de Turismo de Galicia, Xosé Merelles iniciou hoxe en Reading a súa viaxe de promoción internacional do Camiño de Santiago polo Reino Unido, participando na xornada 'Primavera no Camiño', promovida pola Asociación de Municipios do Camiño Inglés e na que tamén colabora a entidade do Camiño Fisterra-Muxía.

A iniciativa ten como obxectivo reforzar os vínculos históricos entre Galicia e o territorio británico, especialmente a través das rutas inglesa e Fisterra-Muxía, nun contexto marcado pola preparación do Xacobeo 2027.

Na inauguración da xornada, destacou a idoneidade da iniciativa para dar maior visibilidade ás rutas inglesa e Fisterra-Muxía no mercado británico.

Precisamente, Merelles recordou a evolución positiva en Galicia durante os últimos anos, resaltando que «en 2025 superáronse os 130.000 viaxeiros do Reino Unido e as case 230.000 durmidas en Galicia», o que se traduciu no maior crecemento do mercado en número de visitantes en 2025, rexistrando un incremento do 14,6 %.

Así mesmo, subliñou «as máis de 14.600 compostelas entregadas» a peregrinos ingleses o ano pasado.

«O Reino Unido consolidouse como o cuarto mercado internacional máis importante en Galicia e o quinto país de orixe de peregrinos internacionais», advertiu Merelles.

En referencia ao Camiño Inglés, unha das rutas históricas máis importantes, subliñou que a colaboración entre a sociedade civil británica e española, xunto coas administracións públicas, as universidades e as igrexas, «constitúe un exemplo de coordinación e cooperación internacional para a recuperación do patrimonio nacional e europeo».

Neste sentido, o representante da Xunta fixo especial fincapé en que o ano pasado máis de 30.000 peregrinos percorreron o Camiño Inglés e case 15.000 peregrinos británicos realizaron algunha ruta xacobea en Galicia.

O programa da xornada incluíu tamén un espazo promocional cunha carpa informativa onde estiveron presentes a Xunta e diversas asociacións vinculadas ao Camiño de Santiago, constituíndo un espazo crave para o contacto directo cos asistentes.

A través destes puntos, ofreceuse material informativo, información detallada sobre as diferentes rutas xacobeas e os recursos turísticos de Galicia, achegando a experiencia do Camiño ao público, resolvendo dúbidas e fomentando o interese pola peregrinación.