O Consorcio das Mariñas propón destinar case un 60% do novo contrato de lixo a custos laborais

O novo contrato para a recogida e transporte do lixo do Consorcio das Mariñas expón destinar case un 60% do prezo total aos custos laborais. A entidade que dá servizo aos municipios de Culleredo, Cambre, Carral, Oleiros, Abegondo, Bergondo, Betanzos e Sada saca a información pública a estrutura de custos tras a consulta a operadores económicos do sector, un proceso necesario ao ser unha concesión de servizos superior aos 5 millóns de euros. Os orzamentos do Consorcio prevén destinar 8,23 millóns de euros a este servizo durante o 2026.

Novotec, a consultora encargada da redacción dos pregos do novo contrato, recibiu información de sete empresas da industria para elaborar a proposta, que sae agora a información pública durante 20 días.

Os pregos do novo contrato destacan que o 58,97% dos custos serán destinados aos custos laborais, mentres que un 8,47% destinaranse a carburante, un 6,68% a mantemento e reparacións e un 0,8% a impostos. A revisión de prezos considerou só os custos de persoal, carburantes e reparación por ser os máis vulnerables a cambios significativos no tempo.

A proposta da estrutura de custos contempla ademais que un 10,23% dos custos sexan para amortizacións, un 6,01% para gastos xerais, un 2,11% para custos de financiamento de investimentos, un 0,54% para outros custos directos, un 2,94% para outros custos indirectos e un 3,25% para beneficio industrial.

Melloras na frota de vehículos

O servizo actual de recollida lévao a cabo a concesionaria actual, Prezero, despois de que o Consorcio aprobase unha prórroga dun ano o pasado mes de outubro. Entón, a entidade supramunicipal destacou que se esperaba que a nova empresa puidese empezar a prestar o servizo en "na primavera ou verán", aínda que tras esta primeira consulta pública durante 20 días aínda faltaría un informe preceptivo da Xunta e aprobar en pleno os pregos definitivos para a licitación, que sairá publicada no Diario Oficial da Unión Europea. Os prazos de posto en marcha do servizo tamén dependerán de se algunha empresa presenta recurso.

No novo contrato prevese melloras para a frota dos camións de recollida e nos servizos para reutilizar, así como unha maior frecuencia de lavado de colectores. O Pleno do Consorcio das Mariñas aprobou en outubro licitar en servizo en dous lotes, un que abarque o groso do servizo e os puntos limpos e outro para contratar a recollida de voluminosos, un servizo do que se fará cargo un centro especial de emprego.

Ademais do contrato de recollida de lixo, a entidade supramunicipal está tamén pendente de licitar o servizo de tratamento e eliminación de residuos. Unha vez ambos os contratos estean en vigor, o Consorcio prevé encargar a unha consulta especializada o estudo para actualizar a ordenanza e taxa.