Os traballos de exhumación da fosa de Beira, en Carral, comezarán este luns

Os restos dos 18 represaliados polo franquismo que aínda xacen no cemiterio de Beira, en Carral, están máis preto de ser identificados. As escavacións para atopar os corpos arrincarán este luns, 6 de xullo, baixo a coordinación do grupo de investigación Histagra da Universidade de Santiago.

Esta primeira cata, explica o grupo, estenderase durante dúas semanas e chega tras unha investigación histórica que permitiu ampliar o coñecemento sobre como chegaran os corpos ata Beira así como os cambios que sufrira o camposanto carralés desde 1936. Ambas as cuestións son unhas das dúbidas que dificultan as escavacións, xa que, como explicaron membros da asociación Cultura Aberta de Carral, en 1951 o cemiterio sufriu fortes modificacións.

Ás modificacións do lugar de enterramento engádeselle que moitos dos represaliados foron fusilados na antiga canteira das Catalinas e que tiveron que ser os veciños os que movesen os corpos para darlles sepultura cristiá.

Os historiadores explican que "como mínimo" hai 18 persoas que foron asasinadas e enterradas en varias fosas en Beira aínda que "hai indicios de que poderían ser máis". Lucía Santiago, encargada da análise histórica, destacou en declaracións a este medio que como paso previo á escavación tiveron que traballar a documentación dispoñible coas memorias transmitidas aos familiares, xa que, 90 anos despois de os crimes, non quedan testemuños directos do que ocorreu. 

Os membros do grupo de investigación contaron coa colaboración da asociación Cultura Aberta, que levan anos traballando pola recuperación da memoria histórica destes represaliados. A entidade inaugurou en 2023 un monumento en memoria das vítimas no lugar dos feitos, como homenaxe e acto de dignificación daquelas presentas represaliadas pola ditadura.

A exhumación de Carral enmárcase dentro do convenio coa Deputación da Coruña para a investigación da violencia franquista en Beira, no cemiterio de Boisaca, en Santiago, onde se estima que foron inhumados uns 97 corpos, e o de Serantes, en Ferrol, onde se cre que se acumularon 190 cadáveres.

O equipo multidisciplinar desenvolve a investigación baixo a coordinación científica de Lourenzo Fernández Prieto e Antonio Míguez Macho, con apoio dos investigadores Xurxo Antelo e Lucía Santiago para a análise histórica, e José Carlos Sánchez Pardo, encargado do estudo arqueolóxico. A análise de antropoloxía forense estará coordinado polo científico Edgard Camarós.