Oleiros celebrará un pleno extraordinario o día 6 co multiusos de Bastiagueiro de protagonista

O próximo 6 de outubro ás 10.00 horas, a Casa Charry será escenario dun pleno extraordinario convocado a instancias dos concelleiros do Partido Popular e do Partido Socialista de Oleiros para tratar diversos asuntos relacionados co Centro Multiusos de Bastiagueiro, aínda en construción.

En concreto, a orde do día da sesión inclúe entre os seus asuntos o procedemento de selección do director xerente das instalacións que, segundo denunciaron os candidatos excluídos, non foi todo o transparente que debería. Así, analizaranse aspectos como os criterios de valoración, a composición e actuación da comisión encargada de valorar aos candidatos, o coñecemento anticipado da designación, a participación da Alcaldía no proceso, os motivos da renuncia do candidato, as garantías do proceso ou as posibles reclamacións ou recursos do resto de aspirantes.

Xunto a estas cuestións, os partidos da oposición terán ocasión de preguntar ao Goberno local por outras cuestións que xa se trataron de abordar noutros plenos, como os custos de explotación previstos do novo recinto, os usos aos que se vai a dedicar e, como último punto, a reclamación da apertura dun expediente ao responsable do estudo geotécnico da obra pola posterior aparición de auga subterránea que, como denuncian desde as formacións demandantes do pleno, custoulle aos veciños e veciñas de Oleiros dous millóns de euros.