O BNG denuncia problemas de mobilidade para acceder ao Chuac

A concelleira do BNG Avia Veira mantivo un encontro con traballadoras do Chuac, en dependencias do propio hospital, para analizar problemas de mobilidade como as deficiencias do transporte público para acceder ao centro —tamén ao Materno— e a falta de aparcadoiro.

«As traballadoras están cada día máis preocupadas e así nolo transmitiron. Cada día teñen máis problemas á hora de chegar ao Chuac ou ao Materno», sinala Veira, quen anuncia que o BNG levará o asunto ao Pleno do próximo xoves 12 de febreiro.

A concelleira nacionalista sinalou que as dificultades xeradas por este problema afectan a todos os usuarios dos hospitais: «O problema sófreno as traballadoras, pero tamén as persoas enfermas cando temos que desprazarnos aos hospitais».

Veira engadiu outra problemática: «Á falta de aparcadoiro habitual súmase agora a desaparición de prazas para estacionar vehículos no exterior do hospital e mantense a mala conexión en transporte público».

O BNG cre que o Goberno local non pode mirar cara a outro lado mentres se produce esta situación. «Recordámoslle ao Goberno de Inés Rey que a mobilidade urbana e o transporte público son competencias propias do Concello».