Más problemas no inicio do curso do instituto de Zalaeta da Coruña: os profesores tampouco entran no centro polas obras

A menos de 24 horas do inicio do curso, a comunidade educativa do instituto Zalaeta da Coruña plántase ante a Consellería de Educación. Xa non son só os pais, que este luns enviaron unha comunicación á Xunta para que atrase o arranque das clases ata garantir que as obras non afectan á seguridade do alumnado. Os profesores tamén cuestionan que a situación da reforma, que inclúe a retirada de amianto, permita desenvolver o seu labor docente con normalidade.

Segundo relata a Asociación de nais e pais do IES Ramón MenéndezPidal , leste mesmo martes estaba previsto celebrar o claustro dos docentes, pero finalmente non tivo lugar, "xa que o profesorado non entrou no centro ante a situación das obras". A agrupación de familias informa nun comunicado que están a realizar "as xestións necesarias" e puxéronse en contacto coa Unidade Técnica, a Inspección Educativa e a Xefatura Territorial da Coruña, ademais da solicitude presentada onte por rexistro electrónico, acompañada do informe técnico sobre o estado do proxecto.

"Neste momento estamos á espera de que a Xunta nos comunique garanta que o centro reúne as condicións necesarias de seguridade para a incorporaciónn do alumnado", engade a asociación, que insiste en que "o único obxectivo" é "garantir a seguridade dos nenos e nenas e que poidan comezar o curso con todas as garantías". No instituto estudan preto de 600 escolares, entre Educación Secundaria, Bacharelato e ciclos formativos.

Visita ao centro

Manuel Maneiro, membro do Ampa do centro e arquitecto técnico, acudiu ao instituto o pasado mes de xuño a petición do equipo directivo, "porque había cousas da obra que lles preocupaban". "Unha cuberta que estaba recentemente cambiada desbordouse e alagara o ximnasio", explica Maneiro, quen redactou un informe sobre o estado dos traballos "que se lle traslada á Consellería, á Federación Provincial de Anpas e á inspección educativa".

En agosto, a directiva do centro volveu pór en contacto coas familias do Zalaeta para trasladar a súa preocupación con relación á volta ao cole. "Pedían atrasar o inicio das clases, e a Consellería prohíbelle ao centro atrasalo", afirma Maneiro, quen informa de que, "extraoficialmente, a Consellería di que o día 9 hai que empezar", e que o que propuxo o centro foi "un inicio gradual".

Unha preocupación engadida, trasladada a Maneiro polo equipo directivo do instituto, é que o persoal docente "non puido nin sequera colocar o material, entón teñen os corredores cheos de cousas que se retiraron das aulas". Maneiro describe, con todo, a comunicación entre familias e persoal do centro como "moi fluída".

En definitiva, "o Ampa solicita de xeito formal pospor o inicio e que, polo menos, antes da apertura do centro o día 9, vaia algún técnico da Consellería para verificar que está en condicións de salubridade".