A Falperra vístese de gala: "A festa é por e para o barrio"

As festas da Falperra regresan un ano máis ás rúas deste barrio da Coruña. A celebración durará desde este sábado 12 ao domingo 13 de setembro na rúa industrial, fronte ao parque de Santa Margarita. Poderase gozar de música e baile en directo, postos de artesanía , xogos infantís e da XII edición do Día do Comercio na Rúa.

A festividade dará comezo co pregón de Pura, antiga dona da pastelería A Vienesa. "Pura é unha persoa que estivo no barrio media vida, case 30 anos. A xente reuníase na pastelería para charlar e a comprar algún que outro doce. Ao final, era unha tenda de proximidade e nós apoiamos o comercio local", explica o presidente da Asociación de Veciños e Comerciantes da Falperra Jaime Suárez. A Vienesa pechou a finais de maio deste ano. "Foi unha persoa á que vimos traballar duramente e que saíu adiante. Na comisión decidimos proporlle dar o pregón, animámola e aceptou", comenta Suárez.

"Por e para o barrio"

Desde a Asociación de Veciños xa están a pór a punto todos os preparativos para a fin de semana. "Hai novidades importantes, sobre todo de temas de artesanía . A xente está moi ilusionada, tanto os veciños como os que veñen de fóra. Isto tamén visibiliza o comercio local", sinala Suárez. Desde hai 12 anos celebran o Día do Comercio na Rúa. "É un día moi importante para nós. Contamos coa participación de moitos comercios e cada vez quere participar máis xente, pero agora mesmo o sitio é o que é, temos a 32 comercios e non contamos con máis espazo", di o presidente da Asociación. Esta acción serve para que os comercios déanse a coñecer e cheguen a máis persoas. "Sempre invitamos á xente a que se dea unha volta por aquí e vexa as distintas casetas", sinala. Os postos que máis destacan son os artesanais. "Hai moitos artistas, e a verdade é que fan cousas moi interesantes e dignas de ver", afirma Suárez.

Estas festas son moi importantes para a veciñanza da Falperra. "Xa levamos moitos anos organizando estas festas, para ser exactos 12, nese sentido xa somos veteranos", afirma Suárez entre risas. A xente aproveita estas festividades para coincidir cos seus veciños de toda a vida e poder gozar tranquilamente do que ten que ofrecer a zona. "Reúnes a toda a xente e vela relaxada e gozando, ademais só faise unha vez ao ano. Implicámonos moito nesta celebración, ao final a festa é por e para o barrio", indica Suárez.

Cooperación

"Para os nenos temos a festa da espuma, as tirolinas e todo o que son os inchables. O Concello tamén nos manda outros xogos, sen a súa colaboración non poderiamos facer todo o que temos planeado", explica Suárez. Esta festa organízaa a Asociación de Veciños e Comerciantes da Falperra, pero moitos veciños axúdanlles coa montaxe dos postos e a organizar as actividades. "Levamos dous meses organizando isto, afortunadamente temos a moita xente que nos apoia. Nós organizámonos, despois presentámoslle o programa ao Concello e aí xa nos dan o visto e prace", comenta Suárez. "A xente sempre está disposta a botar unha man. Nesta zona todo o mundo está unido, sempre saímos adiante", afirma.

Jaime Suárez anima á xente a que se achegue ás festas desta fin de semana. "Afortunadamente, dan bo e sempre vén ben desconectar dos problemas cotiáns. Invitamos a todo o mundo a que veña a gozar da festa e que vexan o comercio que hai no barrio", indica.

Programación

As festas arrincarán co pregón de Pura, e ás 13.30 horas empezará a música co grupo O Curta. Pola tarde haberá un DJ, e ás 17.00 horas haberá unha actuación de baile de Danza 10. A festa da espuma empezará ás 18.00 horas. Ás 19.30 horas actuará o grupo pop Varela & Rois. Á noite cantará Carlos Bau e a banda 80 Razóns ás 22.00 horas.

O domingo 13, ás 13.00 horas tocará a Version's Band. Pola tarde, ás 18.30 horas actuará a banda de música indie A Indirigible, e os encargados de pechar as festas serán o grupo de música cubana Son de Camagüey, ás 20.30 horas. Os dous días haberá xogos infantís e a XII edición do Día do Comercio na Rúa.