La ludopatía entre los mas jóvenes: "Hay una incidencia muy alta de productos como los rascas"

O director técnico da Federación Española de Xogadores de Azar Rehabilitados (Fejar), Juan Lamas, pon o foco nos mozos adictos ao xogo. Recoñece que hai un problema coas apostas deportivas, pero alerta doutros xogos que teñen cada vez máis usuarios. "Hai unha incidencia moi alta do Rasca da ONCE", comenta. Lamas asegura que nos seus centros asistenciais ven usuarios "cada vez máis novos que utilizan as novas ferramentas dixitais", pero tamén os hai que se inician con produtos presenciais.

"Hai usuarios moi novos que comezan a xogar con produtos como os Rascas da ONCE. Son produtos moi adictivos porque se trata dunha aposta pequena que ten un premio inmediato". Preocúpalle, ademais, a "accesibilidade" xa que "non hai ningún control de acceso a Loterías do Estado ou aos produtos da ONCE". Sinala, ademais, que hoxe en día se poden atopar rascas "en gasolineiras , en oficinas de Correos e ata en hospitais".

"Regalar un móbil é como porlle unha pistola no peto a un rapaz de nove anos o día da súa primeira comuñón"

Os móbiles tamén son un problema, xa que fan que sexa máis sinxelo acceder a casas de apostas. "Canto maior sexa a accesibilidade dunha persoa a determinados produtos ou actividades de lecer, especialmente se non existe un labor previo de prevención e formación, máis riscos hai", expón este membro de Fejar. A isto hai que sumar que os nenos e as nenas acceden ao teléfono móbil a idades cada vez máis temperás. "É como porlle unha pistola no peto a un rapaz de nove anos o día da súa primeira comuñón. E isto non só pode ter consecuencias no xogo de azar, senón tamén derivar en condutas como as compras compulsivas, a adicción á pornografía ou o uso problemático das pantallas", manifesta.