Nova liña de axudas da Deputación da Coruña para apoiar actividades extraescolares e facilitar a conciliación

As asociacións de pais e nais de alumnos da provincia da Coruña disporán de 250.000 euros nunha nova convocatoria de subvencións que abre a Deputación para apoiar as actividades extraescolares, o reforzo educativo e os servizos que faciliten a conciliación, así como iniciativas que promovan a inclusión e a igualdade de oportunidades. A partir do próximo venres 20 de novembro, as ANPAs da Coruña poderán acceder a axudas de entre 1.500 e 10.000 euros para desenvolver os seus programas en 2027. A tramitación realizarase a través da plataforma telemática SUBTEL da Deputación da Coruña.

Esta liña de subvencións está dirixida ás ANPAs de centros públicos que impartan o segundo ciclo de educación infantil, educación primaria e educación secundaria na provincia da Coruña. Cada subvención poderá cubrir entre o 20% e o 80% do orzamento subvencionable das actividades, que deberán desenvolverse entre o 1 de xaneiro e o 31 de decembro de 2027.

As axudas concederanse en réxime de concorrencia competitiva e na valoración terase en conta a calidade, a coherencia e o interese educativo dos proxectos presentados, segundo explica o ente provincial, así como a incorporación de propostas innovadoras, a colaboración con entidades da contorna e o grao de participación das familias nas ANPA’s.

Apoio ás familias e á participación na vida escolar

A deputada de Educación, Yoya Neira, destaca as actividades extraescolares, os programas de reforzo educativo, as visitas didácticas e culturais e os encontros e xornadas de convivencia entre as actuacións subvencionables. Tamén figuran servizos que faciliten a conciliación da vida laboral e familiar, ademais da atención ao alumnado antes do inicio da xornada lectiva.

As axudas permitirán ademais desenvolver iniciativas que fomenten a inclusión social, a igualdade de oportunidades, o uso do galego e o respecto polo medio ambiente.