A nova exposición da Fundación MOP, dedicada a David Sims, ultima a súa apertura na Coruña

A sede da Fundación MOP da Coruña ultima a súa reapertura fixada no calendario para o vindeiro sábado 21 cunha exposición dedicada ao fotógrafo británico David Sims. Nas paredes da instalación situada no peirao da Batería xa son visibles os primeiros elementos do rótulo que dará a benvida aos visitantes. O título da mostra ‘David Sims: The Hamster Becomes the Problem’ colga da fachada con letras de estilo graffitti que a vinculan desde o primeiro instante á cultura xuvenil que caracteriza a obra de Sims. Son as primeiras pezas dunha montaxe que previsiblemente quedará completado nos próximos días. Esta nova proposta da Fundación que dirixe Marta Ortega poderá visitarse ata o 1 de maio.

Sims, nacido en Sheffield (Inglaterra) en 1966, é un fotógrafo que traballou tanto o ámbito editorial como publicitario. Na exposición poderase ver tamén a súa obra máis persoal, na que segundo explica a Fundación, desafía unha e outra vez as convencións da fotografía de moda. A súa obra estivo presente en museos como o Victoria and Albert Museum de Londres, o LACMA dos Angeles ou a galería Tate, tamén da capital británica.

A súa mirada serviu para visualizar os cambios do mundo da moda. "Entre a moda e o documental, o íntimo e o performativo, o rebelde e o tenro, a exposición revela a un artista sempre atento ás nocións cambiantes de identidade, beleza e representación, dotado dunha comprensión instintiva do seu papel en tanto que creador de imaxes e dunha afinada percepción da sensibilidade dos seus públicos", destaca a Fundación MOP.