Fútbol | Deportivo
Uruguay chama a Espe Pizarro e España sub 19 convoca a Lucía Rivas e Redru
As canteirás do Dépor Abanca participaron esta semana nas sesións de traballo do combinado nacional en Las Rozas
Espe Pizarro controla un esférico nun partido en Riazor. / Iago Lopez
O Dépor Abanca afronta esta fin de semana un duelo esixente ante o Atlético de Madrid coa permanencia matemática na liga F a tiro de pedra, xusto antes do último parón internacional desta tempada. O conxunto coruñés terá a varias xogadoras lonxe de Abegondo nesta convocatoria. A selección española sub 19 citou a Lucía Rivas e Paula Redruello, Redru, para os partidos de clasificación para o Europeo, mentres que Uruguay conta con Espe Pizarro para a liga de Nacións.
As dúas xogadoras estiveron presentes esta semana nunhas sesións de adestramento na cidade deportiva de Las Rozas ás ordes de David Aznar. Agora, o seleccionador conta con elas para os duelos clasificatorios fronte Hungría, Irlanda do Norte e Portugal. Os tres encontros disputaranse na cidade lusa de Oeiras entre o 12 e o 18 de abril.
Espe Pizarro cruzará o charco para acudir á chamada da selección de Uruguay. A atacante charrúa participará na liga de Nacións da Conmebol. Xogará a domicilio contra Perú e Bolivia e recibirá en Montevideo a Chile .
