Miguel Loureiro: «Debemos xestionar mellor os últimos minutos»

Miguel Loureiro, que regresaba esta fin de semana ao Alcoraz, marchouse da que foi a súa casa cariacontecido despois do empate entre o Deportivo e o Huesca no tramo final do choque.«Estamos amolados. O partido ía como tiñamos planeado. Eles necesitaban gañar e facerse fortes na primeira parte e sabiamos que tiñamos que facer un partido longo porque eles tiñan que arriscar máis da conta. Soubemos ter calma e estar tranquilos para maduralo e esperar á segunda parte para facerlles dano. Chegamos a adiantarnos, pero déusenos o empate nunha situación desafortunada», apuntou.

O defensor admitiu que o equipo debe «xestionar mellor os últimos minutos» e tratou de ver o vaso medio cheo: «Sumamos un punto fóra de casa, que sempre é complicado». Loureiro considera que, pese ao mazazo, o equipo continúa «nunha dinámica de boas sensacións» e non cre que o resultado lles poida afectar: «Estas cousas pasan e somos un grupo moi forte mentalmente».

Nomes propios

O central de Cerceda opinou sobre a entrada de Barcia por Noubi no centro da zaga. «Todos os xogadores que estamos a participar estamos a moi bo nivel, hai momentos para todos e estamos a ser importantes. É unha boa situación para o míster, contar con tantos recursos», indicou.

Para rematar, referiuse a Charlie Patiño, sinalado no gol encaixado: «Isto é fútbol e todos nos equivocamos. Perdemos e gañamos todos, esa é o único xeito de construír un equipo gañador, aínda que soe tópico».