O metal da Coruña recrudece a presión: segunda folga nunha semana

A provincia da Coruña afronta este martes 26 de maio a segunda xornada de folga no sector do siderometal, convocada por CIG, CCOO e UXT para reclamar un convenio colectivo digno que incorpore melloras salariais, redución de xornada e avances en seguridade laboral. Tras o forte impacto do primeiro paro, celebrado o pasado día 19, os sindicatos prevén unha nova mobilización masiva nos principais núcleos industriais da provincia.

Desde primeira hora da madrugada están previstos despregamentos de piquetes informativos nos polígonos de Sabón, Alvedro e A Grela, na Coruña, onde ás 09:30 horas está prevista unha concentración na zona dos concesionarios de Perillo . En Ferrol , os piquetes comezarán ás cinco da mañá nos accesos de Navantia e continuarán desde as oito polos polígonos da comarca, antes dunha manifestación convocada ao mediodía desde a porta principal dos estaleiros ata o porto. En Santiago , os piquetes despregaranse desde as sete no polígono do Tambre e ás doce partirá unha marcha desde Salgueiriños ata a Alameda.

A primeira xornada de folga tivo un seguimento moi elevado e provocou unha paralización significativa da actividade industrial. Os polígonos da Grela, Sabón e Alvedro rexistraron paros case totais nas empresas de maior tamaño, mentres que nas pequenas e medianas o seguimento superou o 80%, segundo os sindicatos. En Ferrol , a actividade nos estaleiros de Navantia quedou practicamente detida. Miles de traballadores participaron nas mobilizacións convocadas na Coruña, Ferrol e Santiago. Na cidade herculina, a manifestación reuniu entre 1.500 e 2.000 persoas, segundo as cifras achegadas pola Policía Local e as organizacións sindicais, e ao redor de 800 persoas integraron os piquetes informativos desde primeira hora. A xornada deixou tamén retencións e cortes puntuais de tráfico en vías principais como a avenida de Arteixo, a rolda de Outeiro e a contorna de Paxarelas .

O conflito enmárcase nunha negociación colectiva estancada desde hai meses. O convenio provincial está caducado desde decembro e acumula máis dunha decena de reunións sen avances significativos. As centrais sindicais reclaman unha cláusula de revisión salarial vinculada ao IPC, a redución da xornada anual a 1.712 horas, melloras en prevención de riscos e formación, complementos por incapacidade temporal e límites á subcontratación en cadea e ao uso de ETT . Os sindicatos advirten de que, se a patronal non presenta propostas que permitan desbloquear a negociación, o conflito podería intensificarse nas próximas semanas, situando ao sector do metal nun dos escenarios laborais máis tensos dos últimos anos na provincia.