Accidente múltiple na AP-9 á altura de San Lázaro: un dos feridos, hospitalizado na UCI

A borrasca Ingrid está a deixar unha mañá complicada no tráfico en Santiago de Compostela. Aproximadamente ás 8.30 horas varios vehículos víronse implicados nun accidente múltiple que requiriu a intervención dos bombeiros para excarcerar a dúas persoas. Un deles, de 44 anos de idade atópase hospitalizado na UCI do Hospital Clínico. O suceso produciuse coincidindo cunha forte granizada que caeu a esa hora na cidade na autoestrada AP-9 preto da saída de San Lázaro.

Fuentes dos Bombeiros indican que o 112 requiriu a súa intervención sobre as 8.43 da mañá para acudir a un sinistro no que se viron implicados 5 vehículos, catro turismos e un camión. A forte granizada provocou unha saída de vía e colisión entre os coches. Os axentes tiveron que excarcerar a dúas persoas que quedaran atrapadas en dous vehículos e ademais na zona había polo menos outros dous feridos de diversa consideración. O accidente produciuse no punto quilométrico 69 en dirección á Coruña. No Hospital Clínico deuse asistencia sanitaria a tres dos feridos, ademais do que se atopa na UCI, outras dúas persoas foron atendidas con lesións leves. Unha cuarta persoa foi trasladada ao hospital privado da Rosaleda.

Ao accidente acudiron tamén efectivos da Garda Civil que esta mañá comunicaban que as condicións meteorolóxicas estaban a deixar unha mañá extremadamente complicada con varios accidentes en diferentes puntos da autoestrada e tamén da AG-56. A Garda Civil fai un chamamento a conducir con precaución e "adecuar a velocidade ás condicións da via".

Ademais, durante a mañá tamén se rexistrou outro accidente de tráfico na zona da Barcia á altura do Centro Superior de Hostalería no que se viron implicados un coche e un camión, segundo informan testemuñas presenciais.

Caídas de árbores

Ademais da intervención na AP-9, os Bombeiros de Santiago tiveron que realizar tamén varias saídas durante a pasado madrugada para despexar vías pola caída de árbores. En concreto tiveron que acudir a puntos de Chaián, Figueiras ou a zona da Rocha. Afortunadamente nestes puntos non houbo que lamentar danos persoais.