A DXT pecha o tráfico a camións en estradas entre Galicia e a Meseta

Galicia vive desde esta madrugada o episodio invernal máis complicado do que vai de tempada. A chegada da borrasca Ingrid, un episodio meteorolóxico que trae nevadas xeneralizadas, fortes ventos, choivas persistentes e un acusado descenso das temperaturas está previsto que complique moito o tráfico nas estradas de toda a comunidade. Tanto é así que a Dirección Xeral de Tráfico (DXT) prohibiu desde as 00.00 horas de hoxe e ata novo aviso a circulación de camións nas principais estradas nacionais e autovías que unen a Meseta con Galicia debido á neve.

A restrición afecta a toda a autovía A-52 en desde Rionegro Puente (Zamora) ata Ponteareas, a AP-53 desde Santiago a Dozón, a AG-53 desde Ourense a Dozón, a N-120 desde Burgos a Ponteareas, a N-525 completa desde Benavente a Santiago e a N-541 desde a localidade ourensá de Barbantes á pontevedresa de Cerdedo-Cotobade. Esta resolución da DXT afecta os vehículos de mercancías —cargados ou non— de máis de 7.500 quilos de masa máxima autorizada, co fin de garantir as condicións de seguridade e a circulación dos vehículos de emerxencia. A duración do peche viario aos camións acordarase en función da evolución do temporal, polo que desde Tráfico recomendan que se estea atento á súa páxina web www.dgt.es.

Segundo a previsión meteorolóxica, a neve podería chegar a verse en cotas de ata os 400 metros, polo que podería afectar a capital ourensá e numerosas localidades da zona interior de Galicia, nas que Ingrid deixa avisos laranxas e amarelos, segundo a AEMET e Meteogalicia.

Ante esta situación desde Tráfico recomendan aos condutores particulares que eviten os desprazamentos en coche que non sexan imprescindibles polas zonas nas que hai previsión de nevadas e adoptar medidas de precaución como levar instalados pneumáticos de inverno ou dispor de cadeas nos vehículos.

Ante este escenario, a Comisión Escolar de Alertas acordou a suspensión das clases e do transporte escolar durante toda a xornada de hoxe en todas as zonas da provincia de Ourense, unha medida que tamén se estende a áreas de Lugo e ao interior da provincia de Pontevedra. En total afecta a 160 dos 313 concellos galegos. Tamén permanecerán pechadas as escolas infantís e tampouco abrirán as portas o campus ourensán.

Un dos aspectos máis excepcionais do temporal será o seu impacto na área do Miño. A AEMET activou o aviso amarelo para esta zona climática, con acumulacións previstas de ata 4 centímetros en 24 horas.