Sanidade aproba un novo plan para abordar a saúde mental: prevé incorporar 350 profesionais no próximos catro anos

A pandemia do coronavirus erosionó a saúde mental de millóns de persoas que se viron confinadas nas súas casas. En Galicia a situación non foi distinta e, desde entón, son cada vez máis quen padece algún trastorno que precisa atención profesional. Neste contexto, o Executivo galego deu este luns o visto e prace ao seu segundo plan estratéxico para abordar a saúde mental. O principal obxectivo, tal como detallou o conselleiro de Sanidade, Antonio Gómez Caamaño, é «consolidar un sistema máis accesible, humanizador e innovador», con especial atención aos colectivos considerados máis vulnerables, entre eles nenos, adolescentes e persoas maiores.

Para iso, a Xunta márcase como propósito incorporar durante o próximos catro anos, período de vixencia do plan, a 357 profesionais deste ámbito. Deles, 124 serán psiquiatras e psicólogos clínicos. Caamaño apuntou que 22 integraranse «de xeito progresivo» na Rede de Psicoloxía Clínica de Atención Primaria, ata completar un equipo de 50 profesionais. A eles sumaranse 101 profesionais de enfermería especialistas en saúde mental, 68 técnicos en coidados auxiliares de enfermería, 29 traballadores sociais, 21 terapeutas ocupacionais e 14 auxiliares administrativos.

O Executivo destinará a todo iso unha partida «histórica» de 177 millóns de euros, coa que busca «redobrar esforzos» fronte á estratexia anterior, cuxo orzamento foi de 83 millóns. «Queremos dar resposta a unha demanda crecente de atención en saúde mental mediante un incremento dos recursos económicos e humanos e unha mellora da coordinación e accesibilidade dos servizos», remarcou Caamaño ante os medios de comunicación tras a reunión semanal do Goberno galego.

A estratexia, que a Consellería irá debullando con maior detalle nos próximos días, establece seis liñas de actuación, dentro das que se porán en marcha diferentes medidas: trastorno mental grave; saúde mental na infancia e a adolescencia; atención en idades avanzadas; trastorno mental común; programas e unidades monográficas; e trastornos adictivos e condutas relacionadas. O titular de Sanidade avanzou que entre as novidades do novo marco de actuación está estender as unidades de rehabilitación psiquiátrica hospitalaria a todas as áreas sanitarias, potenciar a hospitalización a domicilio para os pacientes con trastornos de maior gravidade e ampliar os equipos de continuidade de coidados e as prazas de rehabilitación psicosocial e laboral.

No caso dos menores, outro dos colectivos considerados vulnerables, entre os propósitos da Xunta está a ampliación progresiva ata os 18 anos dos tratamentos de psiquiatría infantojuvenil, co obxectivo de garantir un paso seguro á idade adulta dos adolescentes con alta complexidade clínica, así como reforzar a detección temperá de condutas de risco. Para as persoas maiores desenvolveranse programas específicos de psicogeriatría en todas as áreas sanitarias e actuacións contra a soidade non desexada.

Respecto dos trastornos mentais comúns, especialmente a ansiedade e a depresión, reforzarase a capacidade de Atención Primaria e consolidarase a Rede de Psicoloxía Clínica para priorizar as intervencións psicolóxicas fronte ao uso excesivo de psicofármacos. O plan prevé ademais ampliar os programas para patoloxías de alta complexidade, como a conduta suicida, a depresión resistente ou os trastornos da conduta alimentaria, coa creación dunha segunda unidade de referencia para estes últimos no sur de Galicia.

Fonte: O Correo Gallego