Sada e a Deputación acordan a cesión de dúas estradas para o proxecto de apertura do río Maior

A cesión das estradas provinciais, DP-0812 e DP-0813, foi un dos asuntos tratados na reunión que mantiveron este luns o presidente da Deputación, Valentín González Formoso, e o alcalde de Sada, Benito Portela, co obxectivo de avanzar no proxecto de apertura do río Maior, unha actuación estratéxica para Sada orientada a reducir o risco de inundacións e a mellorar a integración urbana e ambiental do espazo. Durante o encontro, acordouse a formalización dun convenio para a cesión destas dúas vías afectadas pola actuación. O acordo incluirá o financiamento por parte da Deputación das obras de mellora previstas, que inclúen a renovación das beirarrúas e actuacións de reforzo da seguridade viaria, mentres que o Concello asumirá os trámites administrativos que permitirán iniciar os traballos canto antes.

A cesión destas estradas provinciais é un "requisito imprescindible" para que a Xunta continúe coa licitación do proxecto de apertura do río Maior, que xa está redactado. A institución provincial levará a pleno o próximo mes de maio o convenio que permitirá formalizar a cesión das vías e financiar as melloras previstas.