Peche por obras na estación ferroviaria da Coruña os días 27 e 28 de marzo: trens afectados e alternativas

O peche da estación de trens da Coruña os próximos 27 e 28 de marzo obriga a Renfe a deseñar un plan alternativo de transporte para garantir a mobilidade dos viaxeiros. As obras que Adif realizará na infraestrutura da estación deixan sen servizo aos trens que circulan na tarde do venres 27 con destino A Coruña e, ata o mediodía do sábado 28, todas as circulacións con orixe e destino a esta estación ferroviaria.

Veranse afectadas as liñas de Media Distancia que conectan A Coruña con Vigo, Santiago de Compostela, Ferrol, Lugo, e a conexión de Alta Velocidade con Madrid, en ambos os sentidos, o que obrigará a realizar unha parte do traxecto por estrada. A compañía avanza que programou autobuses e taxis para pór a disposición dos viaxeiros e suplir a interrupción do servizo en 27 conexións.

Adif indica que podería adiantarse a saída dalgúns trens afectados desde a estación da Coruña e algunhas liñas poderían chegar máis tarde do habitual, polo que se recomenda consultar os horarios antes de viaxar.

Tamén durante os días 29, 30 e 31 algúns servizos rexistrarán pequenas alteracións nos seus tempos de viaxe e empregarán uns minutos adicionais en completar o traxecto previsto.

Os billetes poden adquirirse nos puntos de venda habitual: despachos de billetes, máquinas autoventa, aplicación de Renfe, no teléfono 912320320 e en www.renfe.com .