O 87% da avogacía coruñesa móstrase insatisfeita coa Administración de Xustiza

O 87% da avogacía coruñesa móstrase insatisfeita coa Administración de Xustiza, segundo o Barómetro realizado polo Colexio de Avogados  da Coruña nos partidos xudiciais da Coruña, Betanzos, Carballo, Noia, Muros, Corcubión e Ribeira.

No estudo participaron 419 colexiados e colexiadas ejercientes sobre un censo de 2.131 profesionais, cun nivel de confianza do 9 % e unha marxe de erro de ±4,36%.

O obxectivo da enquisa foi obter unha radiografía da Administración de Xustiza desde a perspectiva de quen traballa diariamente nela e manteñen unha relación directa con todos os seus operadores.

Os resultados reflicten un elevado grao de preocupación entre a profesión, segundo informa o Colexio a través dun comunicado.

O 87% das persoas enquisadas manifesta sentirse insatisfeita ou moi insatisfeita co funcionamento da Administración de Xustiza, mentres que o 93% asegura sufrir algunha incidencia na que puideron verse comprometidos os seus dereitos profesionais.

A valoración máis negativa recae sobre o funcionamento dos xulgados, pois entre as incidencias máis frecuentes sinaladas polos profesionais destacan as dilacións indebidas, os atrasos inxustificados na celebración de actuacións xudiciais, o trato desconsiderado e as dificultades para acceder aos expedientes.

A Fiscalía é un dos órganos mellor valorados no estudo, xa que o 67% dos enquisados afirma non ter incidencias na súa relación co Ministerio Fiscal e unicamente un 28 % considera mala a interacción entre fiscais e avogados durante os procedementos.

Un dos datos máis positivos do barómetro corresponde a Lexnet , cun 89 % dos profesionais que considera que a plataforma é fácil ou moi fácil de utilizar, o mesmo porcentaxe afirma non sufrir problemas técnicos ou experimentalos unicamente de forma excepcional, e o 73 % sinala que o sistema nunca ou case nunca xerou atrasos na tramitación de asuntos.

A Xunta de Goberno do Colexio trasladará as conclusións deste Barómetro ás distintas administracións e autoridades xudiciais competentes, co obxectivo de contribuír á mellora do funcionamento da Administración de Xustiza e das condicións nas que a avogacía desenvolve o seu labor profesional.

O Colexio considera que os resultados constitúen unha ferramenta de gran utilidade para identificar problemas estruturais, promover solucións e reforzar a defensa dos dereitos da cidadanía e dos profesionais que interveñen diariamente na prestación do servizo público de Xustiza.