Italia por fin repara en Lorenzo Amatucci: outro fallo do sistema do que se beneficia o Deportivo

No medio dunha crise galopante na selección italiana que lle levou a perderse os tres últimos mundiais (2018, 2022 e 2026), o Calcio vive nun eterno diván preguntándose cales son as razóns que afastaron á tetracampeona da elite e por que ese talento que necesitan non son capaces de producilo ou se lle escorre entre os dedos nos últimos pasos cara ao profesionalismo. Futbolistas como Koleosho (Paris FC), Kayode (Brentford) ou o propio Amatucci, que tiveron que emigrar para sacar a cabeza na elite, son os vivos exemplos dos fallos do sistema transalpino. Polo menos, xa sexa por esa crise ou polo seu desembarco en LaLiga co Deportivo, o pivote branquiazul está a chamar por fin a atención no seu país despois de que a Fiorentina, quen se gastou máis de 100 millóns no mercado de fichaxes do pasado verán, lou liberase camiño da Coruña por unha cantidade entre os dous e tres millóns. Hoxe, tan só uns meses despois, con el asentado na sub 21 (xa está incorporado) e chamando ás portas da Absoluta e co Dépor forte, en metade de táboa en Primeira , aparece xa a operación como unha especie de roubo de Draft (unha auténtica ganga), cando o centrocampista conta ademais con apenas 22 anos.

Tivo que deixar o seu Arezzo natal aos 13 anos, foi un dos heroes do Europeo sub 19 de 2023 que gañou Italia, só gozou de minutos soltos no primeiro equipo da Fiorentina, pasouse ano e medio na Serie B e unha tempada de Erasmus coas Palmas en Gran Canaria antes de que o Dépor apostase por el e a Fiorentina decidise cortar o cordón umbilical que lle uniu a ese proxecto de todocampista que estivera macerando na base. Uns meses despois, Italia empeza a reparar nel, ponlle o foco. De momento, fíxose habitual na sub 21 coa que está incorporado, pero segundo conta a prensa transalpina, foi unha das opcións que barallou Roberto Mancini para a renovación do centro do campo da Azzurri, xusto cando nos días previos transcendía que a propia Juventus estaba a seguirlle. Os medios no seu país recuperan agora a súa historia de superación e pono no foco, ante outro erro, aínda subsanable, na formación.

Mentres Italia abre os ollos ante un pivote que pode comandar a selección na próxima década, Amatucci empeza a recoller os froitos do esforzo, os sacrificios e os desgustos. É fixo no Dépor e empeza a recibir o recoñecemento que lle regatearon no seu país despois de que tivese que deixar pronto, sendo un adolescente, a unha familia da que xa perdeu varios membros queridos, entre eles a súa nai, en 2024.

A cautela do Deportivo

Na Fiorentina puideron dubidar da súa capacidade para ser o xefe do centro do campo do Artemio Franchi, pero no Deportivo sempre o tiveron claro despois do ascenso do pasado mes de maio a Primeira División en Valladolid. Debían ir a por el. A negociación só prolongouse no tempo porque en Abegondo querían axustar o máximo posible o prezo e porque tiñan medo de pisar areas movedizas ante a posibilidade de que Amatucci brillase nos primeiros compases da pretemporada viola e acabásenlle pechando a porta a unha saída cantada e case pactada. Finalmente, todas as pezas cadraron para goce de Riazor e para desgraza do seu club e do propio Calcio. O Dépor, pouco dado a vender nos últimos tempos, conta agora cun activo no campo e na súa conta de resultados, porque o 16 do Dépor ten un valor de mercado moito maior que hai só uns meses.